Prokuroria Tiranë kërkon arrest me burg për dy shtetas shqiptarë dhe dy italianë pas akuzave për pastrim parash nëpërmjet tregtisë së floririt. Ata janë të dyshuar për fshehjen e të ardhurave dhe pastrimin e produkteve të veprave penale ose të veprimtarisë kriminale, në shkelje të neneve 180 dhe 287/2 të Kodit Penal. Prokuroria pranë Gjykatës së Shkallës së Parë Tiranë ka bërë kërkesën për vendosjen e masës së sigurisë “arrest në burg”.
Prokuroria Tiranë ka regjistruar procedimin penal nr. 840, të vitit 2020, në lidhje me Subjektin TIRANA-BULLION Sh.p.k me administratore shtetasen K. K.
Gjatë hetimeve, nga ana e Prokurorisë u arrit të evidentohej një skemë e mirëfilltë e transferimit të shumave monetare me prejardhje të dyshuar kriminale nëpërmjet sistemit bankar nga Italia me destinacion Shqipërinë.
