Një prej rivalëve të Erdogan tërhiqet nga gara 3 ditë para zgjedhjeve presidenciale, i hap rrugë bashkimit të opozitës në një front

Kandidati në zgjedhjet presidenciale në turqi, Muharrem Ince, është tërhequr nga gara, në një nxitje të mundshme për përpjekjet e opozitës për të rrëzuar presidentin Rexhep Tajip Erdogan në votimin e së dielës.

Sipas mediave të huaja, Ince kishte numër të ulët të mbështetësve në sondazhe dhe disa figura të opozitës kishin frikë se ai do të ndante votën kundër Erdoganit.

“Unë po tërhiqem nga kjo garë. Unë po e bëj këtë për vendin tim”, tha ai në një konferencë shtypi në Ankara, duke shtuar se ishte përballur me një “fushatë shpifjesh”. Megjithatë, emri i Ince do të mbetet në fletëvotim.

“Nuk dua të më fajësojnë mua kur humbasin”, tha ai duke iu referuar opozitës kryesore.

Partia e tij e qendrës, Atdheu, do të mbetet në garën parlamentare. “I bëj thirrje secilës familje t’i japë Partisë Atdheu të paktën një votë,” tha ai.

Ince nuk mbështeti asnjë nga kandidatët e mbetur në garë.

59-vjeçari kandidoi për president në vitin 2018, por humbi kundër Erdoganit. Në mars të këtij viti, ai u shkëput nga Partia Popullore Republikane (CHP) e Kilicdaroglu dhe iu bashkua garës presidenciale. Ai fillimisht hodhi poshtë thirrjet e ish-partisë së tij për t’u tërhequr mes shqetësimit se do t’i hiqte votat rivalit të Erdoganit.

Turqia mban zgjedhje çdo pesë vjet. President zgjidhet kandidati që merr më shumë se 50% të votave në raundin e parë, por nëse asnjë kandidat nuk merr shumicën, zgjedhjet shkojnë në një raund të dytë midis dy kandidatëve që kanë marrë numrin më të madh të votave në raundin e parë.