Kurti takon senatorët amerikanë: Kapitulli i dialogut duhet të marrë parasysh përpjekjet e Serbisë për aneksim

Kryeministri Albin Kurti është takuar me senatorët amerikanë, Jeanne Shaheen dhe Peter Welch.

Kurti ka thënë se i informoi ata me të dhënat e fundit për sulmin e 24 shtatorit, përfshirjen e Serbisë dhe dëshmitë se sulmi në Banjskë ka qenë pjesë e planit më të gjerë për aneksimin e veriut të Kosovës përmes sulmeve të koordinuara në 37 lokacione.

Ai ka theksuar se pa marrë parasysh tendencat e Serbisë për destabilizim, dialogu nuk mund të vazhdojë normalisht.

“Institucionet e inteligjencës kanë vërejtur se ka pasur një rritje të rrezikut të sulmeve nga Serbia. Unë jam kryeministër i të gjithë qytetarëve të Kosovës, të gjitha komuniteteve të vendit tonë prandaj të gjitha këto përpjekjet për destabilizim duhet të ndërpriten tani. Dialogu i lehtësuar nga BE nuk mund të vazhdoj thuajse nuk ka ndodhur asgjë. Kapitulli i dialogut për normalizim duhet të marrë parasysh edhe veprimet agresive të Serbisë dhe përpjekjet e saj për aneksimin e Kosovës. Duhet të merren hapa që dialogu të ketë edhe një shans që të ketë sukses. Është më urgjente se kurrë më parë që Serbia të ndërpres fjalën se nuk do ta njohë kurrë Kosovën”, ka thënë Kurti.

Kurse senatorja Shaheen ka përsëritur se rajonit i duhet stabiliteti dhe paqja dhe për këtë duhet të punohet me çdo kusht.

“SHBA-ja është pranë jush”, ka thënë ajo në konferencën e përbashkët me Kurtin.