Babai në krye të detyrës në sallën operative të Fierit kur mori vesh vrasjen e djalit

Asllan Cenalia ishte në krye të detyrës në sallën operative të policisë së Fierit, kur mori vesh lajmin e vrasjes së djalit, Novruz Cenalia.

55-vjeçari i cili punon si polic në sallën operative, ku merren dhe jepen lajmet e ngjarjeve të ndodhura, ka marrë vesh i pari vrasjen e djalit.

Djali i tij, efektiv i forcave ‘Shqiponja’ ishte nisur për në punë kur u vra me një plumb në kokë nga 23-vjeçari Asllan alias Azgan Mërnica. Ka dyshime se shkak për këtë ngjarje të rëndë është bërë parakalimi i makinave në rrugët e ngushta të fshatit Baltëz, por nuk përjashtohen edhe motivet e hakmarrjes apo gjakmarrjes.

Autori 23-vjeçar ka qenë në makinë me nënën e tij kur ka vrarë efektivin e policisë. Pas ngjarjes ai është larguar dhe ka braktisur makinën te shtëpia e dajës së tij. Nga këtu ai dyshohet se ka ikur në këmbë, por që prej mesditës së djeshme vijon të jetë në kërkim.

Policia ka ngritur disa postoblloqe në hyrje-daljet e qytetit dhe ka kryer kontrolle në disa fshatra, por pa asnjë rezultat.