Kuvendi nuk i dogji mandatin Berishës, Bardhi: Nikolla lexoi drejt Kushtetutën, kërkuam që të marrë pjesë në seanca

A ka një marrëveshje apo  pazar  Rama- Berisha ?

Kreu i Grupit Parlamentar të Partisë Demokratike Gazment Bardhi ka folur lidhur me vendimin për të mos iu hequr mandati i deputetit ish-kryeministrit Sali Berisha.

Gjatë fjalës së tij në mbledhjen e Konferencës së Kryetarëve, Bardhi është shprehur se Lindita Nikolla, ka lexuar drejt Kushtetutën sa i përket mandatit të Berishës.

Bardhi shprehet se mos ndërprerja e mandatit të Berishës, i jep fund debatit dhe spekulimeve “te sponsorizuara nga segmente të mazhorancës”.

Ndër të tjera, ai shprehet se kanë kërkuar që të krijohet mundësia që Berisha të marrë pjesë në seancat plenare dhe aktivitet e tjera parlamentare.

“Sot Kryetarja e Kuvendit, lexoi drejt Kushtetutën sa i përket mandatit të kreut të opozitës Sali Berisha. Strukturat ligjore të kuvendit argumentuan se Sali Berishës nuk i ndërpritet mandati pasi mungesa e tij në Kuvend nuk është pa arsye. Kjo i jep fund debatit dhe spekulimeve të sponsorizuara nga segmentet të mazhorancës. Ne kërkuam që zotit Berisha, ne përputhje me Kushtetutën t’i krijohet mundësia që të ushtrojë të plotë mandatin e deputetit duke marrë pjesë me seancat parlamentare dhe aktivitetet e tjera parlamentare”, tha Bardhi.

Ka qenë kryetarja e Kuvendit, Lindita Nikolla, ajo e cila ka thënë se pas këshillimit me njohësit e Kushtetutës, masa e arrestit në shtëpi nuk konsiderohet mungesë pa arsye në Kuvend.

“Dua t’i japim fund spekulimeve. Qenia e një personi nën këtë masë nuk mund të konsiderohet si mungesë pa arsye në Kuvend. Jemi konsultuar me njohës të ligjit dhe Kushtetutës”, mësohet të ketë thënë Nikolla në mbledhjen e Konferencës së Kryetarëve.

Qëndrimin e socialistëve e kanë përshëndetur demokratët, ku kreu i grupit parlamentar të PD-së, Gazment Bardhi i pranishëm në mbledhje ka mirëpritur këtë hap për të mos rikthyer klimën e konfliktit në Kuvend.

Ky veprim i PS-së, konfirmon edhe një herë pazarin Rama-Berisha. Si në rastin e amnistisë penale, ku Rama i dha Berishës dy komsione hetimore në këmbim të votimit të amnistisë penale, tani pritet që pasi Berisha mori vulën dhe shpëtoi mandatin, t’i jap diçka në këmbim Ramës.