Arrestohet në Prishtinë i riu që falsifikonte monedha në euro

Një 34-vjeçar nga Maqedonia e Veriut, i cili dyshohet se ka prodhuar qindra mijëra monedha 2 euro gjatë dy viteve të fundit, u arrestua në Prishtinë gjatë një aksioni të Europol-it.

Në Maqedoninë e Veriut u kontrolluan njëkohësisht disa lokacione, ku u sekuestruan makineri për prodhimin e valutës së falsifikuar dhe mijëra monedha të falsifikuara.

Personi i arrestuar është identifikuar si punonjës i MPB-së në Maqedoninë e Veriut.

Monedhat e sekuestruara gjatë kontrolleve do të ekzaminohen më tej, duke i krahasuar me monedha të tjera tashmë të tërhequra nga qarkullimi për të vlerësuar shkallën reale të prodhimit.