Kush do të jenë politikanët e radhës në listën e zezë të SHBA-së

SHBA do të publikojë së shpejti një tjetër listë me persona “non-grata” nga Ballkani Perëndimor.

Media e Maqedonisë së Veriut, “INA” raporton lista e zezë do të përfshijë emra politikanësh nga Shqipëria, Kosova, Serbia, Mali i Zi, Bosnjë-Hercegovina dhe Maqedonia e Veriut.

Sipas raportimit, kjo listë e zezë do të shpallet për shkak të kërcënimeve të vazhdueshme të sigurisë, paqes, por edhe korrupsionit alarmant.

Kjo listë e zezë vjen pas emergjencës kombëtare të shpallur nga administrata amerikane më 26 qershor të vitit 2001, lidhur me Ballkanin Perëndimor, e cila është zgjatur edhe nga presidenti aktual, Joe Biden.

Kujtojmë se në listën e zezë të SHBA-së janë disa politikanë, ish-zyrtarë, por edhe personazhe të medias.

I pari që ka përfunduar në listën e zezë të amerikanëve ka qenë ish-Prokurori i Përgjithshëm, Adriatik Llalla, i cili u shpall “non-grata” në 14 shkurt të vitit 2018.

Në 16 prill të 2018-ës u shpall “non-grata” ish-deputeti Tom Doshi.

Më 30 Korrik të 2019-ës, në listën e zezë hyri ish-kryebashkiaku i Durrësit, Vangjush Dako.

Më 26 maj të vitit 2021 u shpall “non-grata” ish-kryeministri Sali Berisha, ndërsa më 11 Prill 2022 ish-deputeti Aqif Rakipi dhe Ylli Ndroqi.