Si do ndikojnë votat e Kennedy në presidencialet e SHBA

Memo sekrete e Republikanëve: Trump humbi zgjedhjet në 2020

Ekipi i ish-presidentit Donald Trump pranoi se republikani humbi dy shtete kryesore të fushëbetejës në zgjedhjet e 2020.

Në një memo të re konfidenciale, anketuesi i Trump, Tony Fabrizio, informoi të premten fushatën e Trump se vendimi i kandidatit të pavarur Robert F. Kennedy Jr. për të hequr dorë nga gara dhe për të mbështetur Trumpin është “lajm i mirë” për republikanët.

Por kishte një të dhënë që tërhoqi vëmendjen e vëzhguesve politikë. Pas llogaritjes se si do të ndikojë tërheqja e Kennedy për Trumpin, Fabrizio – një anketues veteran i GOP dhe aleat i vjetër i Trump – pranon se Trump humbi Arizonën dhe Georgian në përballjen e 4 viteve më parë me Joe Biden.

Trump ende nuk i ka pranuar zgjedhjet e vitit 2020.

“Për t’i vënë këto shifra në perspektivë, vota neto e fituar në një shtet si Arizona bazuar në vetëm një model pjesëmarrjeje të vitit 2020 do të ishte mbi 41,000 vota, gati 4 herë më shumë se diferenca fituese e Bidenit ose në Georgia, fitimi do të ishte mbi 19,000 vota, gati dyfishi i Bidenit”, thuhet në memorandum.

Në zgjedhjet e fundit presidenciale, Biden i bëri blu Arizonan dhe Georgian. Në 72 vitet e fundit, vetëm dy kandidatë demokratë për president, Bill Clinton dhe Harry Truman, kanë fituar Arizonën në zgjedhjet e përgjithshme. Fitorja e Bidenit në Georgia ishte një tjetër fitore e madhe për Partinë Demokratike, e cila nuk kishte fituar shtetin jugor për gati 30 vjet.

Shënimi i Fabrizios vjen disa orë pasi Kennedy pezulloi fushatën e tij presidenciale dhe dha mbështetjen e tij për Trump.

Në një konferencë shtypi nga Arizona, kandidati i pavarur tha se “shkaqet parimore” që e shtynë atë të largohej nga Partia Demokratike dhe tani që mbështet Trump ishin “Fjala e lirë, lufta në Ukrainë dhe lufta për fëmijët tanë”.