Fundi politik i një kryebashkiaku të korruptuar

Erion Veliaj, një emër që për vite me radhë ka mbizotëruar skenën politike të Tiranës, duket se po i afrohet fundit të tij politik. Kryetari i Bashkisë, i njohur për aftësinë e tij të jashtëzakonshme për të manipuluar opinionin publik dhe për të promovuar veten si një “Superman” i qytetit, tani përballet me realitetin e errët të skandaleve dhe korrupsionit të paimagjinueshëm që e ka karakterizuar administratën e tij.

Sipas burimeve të brendshme nga Partia Socialiste, në mbledhjen e Asamblesë më 8 shtator, pritet që Veliaj të shkarkohet nga të gjitha detyrat politike që mban. Kjo lëvizje duket se është e pashmangshme, pas përfshirjes së tij në disa nga dosjet më të nxehta që kanë tronditur politikën shqiptare, duke përfshirë aferën e inceneratorit të Tiranës, shembjet e dhunshme te “5 Maji”, çështjen e Teatrit Kombëtar, dhe aferën famëkeqe “5D”.

Nëse më parë Veliaj kishte arritur të mbronte veten përmes një propagande të sofistikuar dhe një rrjeti të fuqishëm mbështetësish brenda dhe jashtë politikës, tani duket se SPAK-u ka filluar të ngushtojë lakun rreth tij. Jo vetëm që ai po hetohet për pasuri të dyshimta, por edhe familjarët e tij janë nën lupën e drejtësisë. Drejtorët e tij, të cilët për vite me radhë kanë vepruar si një grup i strukturuar kriminal, tashmë janë arrestuar dhe po përballen me akuzat e abuzimit me fondet publike, duke shkelur në mënyrë të pandalshme ligjin për të përfituar tendera të dyshimtë.

Situata në Tiranë është kthyer në një katastrofë, ku qytetarët paguajnë miliona euro për shërbime që nuk ekzistojnë realisht. Kryeqyteti, nën drejtimin e Veliajt, është kthyer në një vend ku korrupsioni dhe keqmenaxhimi kanë arritur kulmin. Plehrat që grumbullohen në rrugët e qytetit janë simboli më i qartë i një administrate që ka dështuar në çdo aspekt të qeverisjes. Ndërkohë që shqiptarët paguajnë 20 milionë euro në vit për evadimin e mbetjeve dhe 10 milionë euro të tjera për incenerimin, inceneratori i shumëpërfolur nuk ekziston, dhe landfilli është në prag të një katastrofe mjedisore.

Propaganda dhe imazhi i rremë që Veliaj ka ndërtuar për veten nuk janë më të mjaftueshme për ta shpëtuar. Goditja që pritet të marrë më 8 shtator në Asamblenë e PS-së mund të jetë fundi i tij politik. Historia do ta kujtojë Erion Veliajn si një kryebashkiak që tradhtoi besimin e qytetarëve dhe u kthye në simbolin e korrupsionit dhe keqmenaxhimit në Shqipëri. Koha e tij po mbaron, dhe Tiranës i duhet një drejtues i ri, që të mund të sjellë transparencë dhe vetëm transparencë.