Gjendet çanta e autorit, FBI jep 50 mijë dollarë për identifikimin e vrasësit të bosit UnitedHealthcare

Tre ditë pas të shtënave ndaj shefit ekzekutiv të UnitedHealthcare, Brian Thompson jashtë një hoteli Hilton në Manhattan, policia ende nuk e di identitetin ose vendndodhjen e autorit.

Pamjet e sulmit, i cili ndodhi rreth orës 6:45 të mëngjesit të së mërkurës, përpara konferencës vjetore të investitorëve të UnitedHealthcare, tregojnë të dyshuarin me një çantë shpine gri.

Të premten, hetuesit thanë se kishin gjetur çantën e shpinës në Central Park, pas një kontrolli të një zone të gjerë liqenesh, pellgjesh, livadhesh, këndesh lojërash dhe pyjesh.

NBC News tha se çanta do të dërgohet e pahapur në një laborator për të parë nëse ka lidhje me të shtënat dhe nëse përmban ndonjë provë të dobishme.

Kjo vjen pasi policia tha se ata mendojnë se i dyshuari ka të ngjarë të jetë larguar nga Neë York City me një autobus menjëherë pas të shtënave.

I dyshuari e fshehu identitetin e tij me një maskë gjatë gjithë kohës që ishte në qytet dhe dukej se paguante me para të gatshme në objektet ku u kap në kamera.

Ndërkohë, FBI tha se po ofron një shpërblim deri në 50,000 dollarë për informacionin “që çon në arrestimin dhe dënimin e individit përgjegjës për këtë krim”.