PD organizon sot mosbindje civile: Plani i Berishës për të “paralizuar” Tiranën

Partia Demokratike pritet të zhvillojë sot një protestë të madhe të mosbindjes civile në Tiranë. Ndryshe nga herët e tjera, në krye të protestës do të jetë edhe lideri demokrat Sali Berisha, i cili kthehet në terren pas një viti në arrest shtëpie për dosjen “Partizani”.

Berisha u ka bërë thirrje qytetarëve të bashkohen masivisht, duke paralajmëruar një akt të madh kundërshtimi. Plani i opozitës përfshin bllokimin e nyjeve kryesore të kryeqytetit, si Unaza e Vogël, Zogu i Zi, Rruga e Elbasanit, Sheshi “Wilson” dhe akset kryesore të Rrugës së Kavajës.

Policia e Shtetit ka kundërshtuar këtë iniciativë, duke garantuar lirinë e protestës, por jo bllokimin e rrugëve, dhe ka paralajmëruar masa ligjore ndaj organizatorëve. Forcat speciale dhe autobotet me ujë janë vënë në gatishmëri për të ndërhyrë në rast përshkallëzimi.

Protesta e fundit e opozitës, më 26 nëntor, paralizoi kryeqytetin për tre orë, dhe pritet që tubimi i sotëm të krijojë një situatë të ngjashme. Policia ka njoftuar se do të devijojë trafikun në rrugë alternative për të lehtësuar qarkullimin.