Letra e Hapur e “Ekspertes së Lëpirjes” për Lindën: Shpërblimi Final në RTSH

E dashur Linda,

Ti, që e ke kthyer artin e mbijetesës politike në një shkencë më vete, sërish ia dole të na kujtosh se në këtë vend të çuditshëm, ku meritokracia është vetëm një fjalë e vjetër nga librat e historisë, gjithçka mund të arrihet me mjeshtërinë e duhur. Dhe kush më mirë se ti mund të gjente të duhurën për një skenar të tillë: Iris Luarasin, modelin perfekt të shërbimit pa kushte ndaj pushtetit dhe familjes sate.

Pas gjithë asaj zhurme publike, kur “ekspertja” e “pavarur” e Shqipërisë në korridoret e Brukselit ishte as më pak dhe as më shumë se gruaja e kryeministrit, kush do ta mendonte se historia do të kishte një kthesë edhe më qesharake? Por ti, Linda, ke durimin e një skulptoreje që punon gurin e pushtetit derisa të marrë formën që do. Dhe formën e radhës duket se e ka marrë RTSH-ja – një institucion në grahmat e fundit, ku miliardat rrjedhin si ujë për të kënaqur ambiciet dhe llogaritë e drejtuesve të radhës.

Të gjithë e dinim se Iris Luarasi ishte një “lëpirëse” e shkëlqyer. Nuk ka mikrofon televiziv që të mos jetë “shkelur” nga fjalimet e saj në mbrojtje të familjes suaj. Nuk ka debat publik që të mos jetë ndotur nga servilizmi i saj i pafund. Dhe tani, pasi i ke dhënë asaj të gjithë skenat e mundshme, RTSH-ja është kurora që mungonte në shpërblimin për 12 vite shërbimi të përulur.

Pse pikërisht RTSH-ja? Përgjigjja është e thjeshtë: sepse aty nuk kërkohet as meritë, as rezultate, as llogaridhënie. Mjafton që “drejtoresha” e re të dijë të menaxhojë burimet – jo për përmirësimin e lajmeve, por për trashjen e llogarive private dhe vazhdimin e një cikli shkatërrues që ka bërë RTSH-në një kukull qesharake në tregun mediatik shqiptar.

Por nuk mund të mohojmë një gjë: Letra e hapur e Irisit për ty, Linda, ishte një kryevepër servilizmi. Kur bota e kritikonte publikisht kryeministrin për kapjen e institucioneve, kur vetë emri yt u bë simbol i abuzimit me rolin e “ekspertit”, Irisi e ktheu përuljen në art. Ajo doli publikisht dhe e mbrojti emrin tënd sikur të ishte fjala për një mbretëreshë, duke u përpjekur të bindte shqiptarët se gjithçka ishte normale.

Dhe kështu, pas gjithë kësaj, shpërblimi ishte i merituar. RTSH-ja do të jetë fusha ku Irisi do të vazhdojë të shërbejë – jo shqiptarëve, por interesave të familjes tuaj. Dhe ne të tjerët, që e shohim këtë cirk nga mënjanë, s’na mbetet veçse të qeshim me hidhërim, ndërsa ju vazhdoni të ndërtoni perandorinë tuaj në kurriz të taksapaguesve shqiptarë.

Me “respektin” e duhur,

Një qytetar që nuk harxhon asnjë sekondë për RTSH-në tuaj të shpërfytyruar.