I dërguari i Trump thotë se nuk ka asnjë shans

Nga Caitlin McFall, FOX NEWS

Presidenti ukrainas, Volodymyr Zelensky, tha këtë javë se nëse SHBA nuk mund të garantojë një rrugë të shpejtë drejt anëtarësimit në NATO, atëherë ka opsione alternative të sigurisë, tw cilat Kievi do t’i pranonte: armët bërthamore.

Por mos mendoni se Shtetet e Bashkuara janë të etur për të rënë dakord me këto kushte.

“Mundësia që ata të rimarrin armët e tyre bërthamore është shumë e vogël ose zero,” tha gjeneral-lejtant Keith Kellogg, i dërguar i posaçëm për Ukrainën dhe Rusinë. “Le të jemi të sinqertë për këtë, ne e dimë se kjo nuk do të ndodhë”.

Në vitin 1994, pas rënies së Bashkimit Sovjetik, Ukraina ra dakord t’i jepte Rusisë armët e saj bërthamore në këmbim të garancive nga Rusia, SHBA dhe Britania e Madhe se sovraniteti dhe pavarësia e saj do të respektohej – një traktat që Moska e ka shkelur me pushtimet e saj të përsëritura – dhe në një intervistë të martën, Zelensky përsëriti se Ukrainës duhet t’i jepen këto armë nëse anëtarësimi i saj në NATO “është jashtë tryezës”.

Por Kellogg, njeriu i ngarkuar nga presidenti Donald Trump për të ndihmuar në përfundimin e luftës trevjeçare, tha se riarmatosja e Ukrainës me armë bërthamore nuk është opsion.

“Mos harroni, presidenti tha se ne jemi një qeveri e arsyeshme,” tha ai. “Kur dikush thotë diçka të tillë, shikoni rezultatin ose potencialin. Kjo duke përdorur sensin tuaj të përbashkët.”

Zelensky konfirmoi të martën gatishmërinë e tij për t’u takuar ballë për ballë me presidentin rus Vladimir Putin nëse kjo është alternativa më e mirë për t’i dhënë fund luftës, megjithëse shefi i Kremlinit nuk ka rënë dakord për ndonjë takim personal me udhëheqësin ukrainas.

Trump tha të dielën se bisedimet fillestare kishin nisur me Ukrainën dhe Rusinë, dhe Kellogg këtë javë konfirmoi se Kievi dhe Moska do të duhet të bëjnë lëshime nëse do të ketë një marrëveshje paqeje.

Administrata nuk ka treguar se çfarë lloj kompromisi do të duhet bërë, veçanërisht kur bëhet fjalë për çështjen më të madhe si për Zelensky-n, ashtu edhe për Putinin: anëtarësimin e Ukrainës në NATO.

“Kjo është një nga arsyet që unë do të shkoj javën e ardhshme në Evropë, për t’i parë ata ballë për ballë,” tha ai. “Unë do kthehem tek presidenti dhe do t’i them, ‘OK, zoti president, ky është shqetësimi i tyre. Ja cilat janë çështjet’.”

Kellogg do të udhëtojë në Konferencën e Sigurisë së Mynihut, e cila zhvillohet nga 14-16 shkurt, ku ai tha se do të takohet me liderët botërorë për të diskutuar luftën e Rusisë në Ukrainë dhe për të marrë një ide më të mirë se ku vende si Britania e Madhe, Gjermania dhe Danimarka, së bashku me ofruesit e tjerë kryesorë të ndihmës ushtarake për Ukrainën, qëndrojnë në negociatat për t’i dhënë fund luftës.