Arrestimi i kinezëve me drogë në Rinas, dalin pamjet e aksionit

Policia Kufitare në Rinas, në bashkëpunim me Drejtorinë Vendore të Policisë Tiranë, Njësinë e Informacionit për Pasagjerin dhe Drejtorinë e Hetimit Doganor, ka finalizuar me sukses operacionin e koduar “Quality”, duke goditur një tjetër rast të trafikimit ndërkombëtar të drogës.

Gjatë operacionit u arrestuan në flagrancë dy shtetas kinezë, Y. G., 37 vjeç dhe Ch. J., 48 vjeç, të cilët sapo kishin hyrë në Shqipëri përmes aeroportit të Rinasit. Ata u kapën me 61 kilogramë kanabis, të ndarë në 120 pako, të futura në dy valixhe.

Sipas Policisë, lënda narkotike dyshohet se është trafikuar nga Bangkoku, Tajlandë, me përqindje të lartë THC, dhe kishte për destinacion shitjen në territorin shqiptar.

Njoftimi i Policisë:

“Finalizohet operacioni policor i koduar “Quality”, i zhvilluar nga DVP Tiranë, Policia Kufitare e Rinasit, Njësia e Informacionit për Pasagjerin dhe Drejtoria e Hetimit Doganor.

Goditet një rast i trafikimit të kanabisit me përqindje të lartë THC nga Tajlanda në Shqipëri.

Sekuestrohen 61 kilogramë lëndë e dyshuar narkotike Cannabis Sativa, e ndarë në 120 pako.

Kapen në Rinas, nga Policia Kufitare, dhe vihen në pranga 2 shtetasit kinezë që trafikuan lëndën narkotike, nga Bangkoku, me qëllim shitjen në Shqipëri.

Në vijim të operacioneve të njëpasnjëshme të zhvilluara nga Policia e Tiranës, me objektiv goditjen e rasteve të trafikimit të lëndës narkotike Cannabis Sativa me përqindje të lartë THC, për shitje në Shqipëri, është goditur një tjetër rast i kësaj veprimtarie kriminale.

Bazuar në informacionet e siguruara nga Njësia e Informacionit për Pasagjerin, Policia Kufitare Rinas, në bashkëpunim me Seksionin e Narkotikëve në DVP Tiranë dhe me Drejtorinë e Hetimit Doganor, organizuan dhe finalizuan operacionin policor “Quality”.

Si rezultat i operacionit u arrestuan në flagrancë shtetasit kinezë:
-Y. G., 37 vjeç dhe Ch. J., 48 vjeç.

Këta shtetas u kapën në flagrancë në hyrje në Rinas me 2 valixhe me rreth 61 kilogramë lëndë të dyshuar narkotike Cannabis Sativa me përqindje të lartë THC, që dyshohet se e kanë trafikuar nga Bangkoku, me qëllim shitjen në Shqipëri. Sasi e kanabisit u sekuestrua me cilësinë e provës materiale.

Vijojnë hetime të thelluara për të identifikuar dhe nxjerrë përpara përgjegjësisë penale, shtetas të tjerë që mund të jenë implikuar në këtë rast.

Materialet procedurale iu referuan Prokurorisë së Tiranës, për veprime të mëtejshme”.