U takua me Putinin, Polonia i jep goditen e papritur Orbanit

Presidenti i ekstremit të djathtë të Polonisë, Karol Nawrocki, ka anuluar takimin e planifikuar me kryeministrin hungarez Viktor Orban, pasi ky i fundit zhvilloi një vizitë të papritur në Moskë për t’u takuar me Vladimir Putin.

Takimi mes Nawrockit dhe Orbanit ishte parashikuar të mbahej të enjten e ardhshme, por presidenti polak vendosi ta kufizojë udhëtimin e tij në Hungari vetëm në pjesëmarrjen në një samit rajonal të liderëve të Evropës Lindore, konfirmoi zyra e tij.

Marcin Przydacz, kreu i Zyrës së Politikave Ndërkombëtare të Presidentit të Polonisë, shkroi në platformën X se “siguria e Evropës varet nga veprimet e solidaritetit, përfshirë edhe në fushën e energjisë”, duke lënë të nënkuptohet se lëvizja e Orbanit bie ndesh me këtë parim.

Viktor Orban u takua me Vladimir Putinin të premten, ku diskutuan për sigurinë energjetike, ndërkohë që Hungaria vazhdon të importojë naftë ruse pavarësisht sanksioneve të BE-së dhe kritikave nga partnerët evropianë.

Përplasja e re mes Varshavës dhe Budapestit thellon më tej ndasitë brenda Evropës  dhe veçanërisht brenda spektrit të të djathtës ekstreme. Partia e Nawrockit, “Ligj dhe Drejtësi”, është rreshtuar me forcat pro-ukrainase të udhëhequra nga Giorgia Meloni në Itali, ndërsa Fidesz-i i Orbanit ka mbajtur një qasje shumë më të afërt me Moskën.