Dyshohet se janë përfituar nga veprimtaria kriminale

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Vlorë, janë konfiskuar pasuri me vlerë mbi 2 milionë euro të shtetasit R.Z., i akuzuar dhe shpallur fajtor për veprën penale “Pastrimi i produkteve të veprës penale ose veprimtarisë kriminale”, të parashikuar nga neni 287 i Kodit Penal.

Vendimi u mor në përfundim të hetimeve të procedimit penal nr. 1922, të vitit 2019, ku gjykata pranoi kërkesën e Prokurorisë dhe e deklaroi fajtor R.Z. për shkelje të nenit 287, pikat (a), (b) dhe (c) të Kodit Penal.

Fillimisht, i pandehuri u dënua me 7 vite burgim, por në zbatim të nenit 406 të Kodit të Procedurës Penale, për shkak të gjykimit të shkurtuar, dënimi u ul me një të tretën, duke u konvertuar përfundimisht në 4 vite e 8 muaj burg.

Paralelisht me dënimin penal, gjykata vendosi konfiskimin e një sërë pasurish të luajtshme dhe të paluajtshme, të cilat dyshohet se janë përfituar nga veprimtaria kriminale.

Pasuritë e konfiskuara janë:

– Pasuri e paluajtshme e llojit “Njësi”, me nr. 54/9-19, me sipërfaqe totale prej 70 m², vol. 31, fq. 87, zona kadastrale 8605, e ndodhur në Vlorë, në pronësi të shtetasit R.Z.;

– Pasuri e paluajtshme e llojit “Njësi”, me nr. 54/9-18, me sipërfaqe totale prej 50 m², vol. 31, fq. 86, zona kadastrale 8605, e ndodhur në Vlorë, në pronësi të shtetasit R.Z.;

– Pasuri e paluajtshme e llojit “Apartament”, me nr. pasurie 49/41 + 1-1, vol. 31, fq. 180, me sipërfaqe prej 159 m², e ndodhur në lagjen “Kushtrimi”, Vlorë, në pronësi të shtetasit V.Z.;

– Pasuri e paluajtshme e llojit “Tokë arë”, me nr. pasurie 105/13, vol. 2, fq. 19, me sipërfaqe prej 5 000 m², zona kadastrale 2838, në bashkëpronësi të shtetasve S.Z., L.Z., E.Z., R.Z., V.Z. etj.;

– Pasuri e paluajtshme e llojit “Truall”, me nr. pasurie 49/41-T, me sipërfaqe prej 105 m², vol. 34, fq. 117, zona kadastrale 8605, e ndodhur në lagjen “Kushtrimi”, Vlorë, në bashkëpronësi të shtetasve V.Z. dhe A.M.;

– Pasuri e paluajtshme e llojit “Apartament”, me nr. pasurie 49/41 + 1-2, me sipërfaqe prej 171 m², vol. 31, fq. 191, zona kadastrale 8605, lagjja “Kushtrimi”, Vlorë, në bashkëpronësi të shtetasve V.Z. dhe A.M.;

– Pasuri e paluajtshme e llojit “Bodrum”, me nr. pasurie 49-41-B, me sipërfaqe prej 181 m², vol. 31, fq. 179, zona kadastrale 8605, lagjja “Kushtrimi”, Vlorë, në bashkëpronësi të shtetasve V.Z. dhe A.M.;

– Pasuri e paluajtshme “Shtesë 4-katëshe”, e ndërtuar mbi bazën e lejes së ndërtimit nr. 2/446, datë 28.09.2011, në bashkëpronësi të shtetasve V.Z. dhe A.M.;

– Automjet i markës BMW, modeli GM730D, në pronësi të shtetasit R.Z.

Sipas Prokurorisë së Vlorës, konfiskimi i këtyre pasurive synon goditjen e përfitimeve ekonomike të krijuara nga veprimtaria kriminale dhe forcimin e luftës kundër pastrimit të parave, duke i kaluar asetet e paligjshme në favor të shtetit.