Plani i Adriatik Lapajt: Qeveri tranzitore, 2 emrat për kryeministër

Kryetari i Partisë “Shqipëria Bëhet”, Adriatik Lapaj, ka bërë publike dy emra që, sipas tij, mund të udhëheqin një qeveri tranzitore me mandat 12-mujor.

Lapaj u shpreh se mjeku i njohur, tashmë në pension, Tritan Kalo, është një figurë që mund të garantojë organizimin e zgjedhjeve shembullore në Shqipëri. Sipas tij, përvoja, integriteti dhe distancimi nga politika aktive e bëjnë Kalon një kandidat të përshtatshëm për drejtimin e një qeverie kalimtare.

Gjithashtu, ai përmendi edhe profesorin Përparim Kabo, duke theksuar se bëhet fjalë për një intelektual me peshë, që mund të kontribuojë në krijimin e një qeverie mbi palët politike.

Sipas Lapajt, këta dy emra do t’i jepnin vendit një qeverisje neutrale, të përqendruar vetëm në garantimin e zgjedhjeve të lira dhe demokratike, çka më pas do të sillte një efekt zinxhir dhe garë reale në çdo nivel.

“Jo të jesh ti kryeministër sepse je provuar. Ideja është një qeveri tranzitore për 12 muaj, me njerëzit më të mirë që ka vendi. Më vjen në mendje profesori Tritan Kalo, i cili është pensionuar dhe jeton në Kanada, dhe jam i bindur se zgjedhjet do t’i organizonte model. Po ashtu edhe profesori Përparim Kabo. T’u japim qytetarëve një qeveri përtej palëve, me mandat të qartë për të garantuar zgjedhje të ndershme. Pastaj, kush fiton, le ta marrë përgjegjësinë me votë të lirë”, u shpreh Lapaj në një intervistë për News24.