Trump paralajmëron presidenten e re të Venezuelës: Do e pësosh si Maduro!

Presidenti i Shteteve të Bashkuara, Donald Trump, ka lëshuar një paralajmërim të fortë ndaj presidentes së përkohshme të Venezuelës, Delcy Rodríguez, duke deklaruar se ajo “do të paguajë një çmim edhe më të lartë se Nicolás Maduro”, nëse nuk ndërmerr hapa që ai i konsideron të drejtë për vendin.

Deklarata u bë gjatë një interviste telefonike për revistën The Atlantic, ku Trump foli gjerësisht për situatën politike dhe ekonomike në Venezuelë. Ai theksoi se Shtetet e Bashkuara nuk e shohin si problem procesin e rindërtimit të vendit, duke nënvizuar se një Venezuelë e qëndrueshme dhe funksionale do të ishte në interes të gjithë rajonit.

Sipas Trump, Venezuela ndodhet në një gjendje të rëndë ekonomike dhe institucionale. “Venezuela është e falimentuar. Ky vend është një katastrofë nga çdo këndvështrim i mundshëm”, u shpreh presidenti amerikan, duke fajësuar keqmenaxhimin dhe korrupsionin për krizën e thellë që ka përfshirë vendin prej vitesh.

Komentet e Trump vijnë në një moment tensioni të shtuar politik dhe diplomatik, teksa zhvillimet e fundit në Venezuelë kanë rikthyer vëmendjen ndërkombëtare mbi rolin e udhëheqjes së përkohshme dhe të ardhmen e vendit. Qëndrimet e Shtëpisë së Bardhë pritet të ndikojnë në raportet mes Uashingtonit dhe Karakasit, si dhe në qasjen e aktorëve të tjerë ndërkombëtarë ndaj krizës venezueliane.