Gjermania ngre aktakuzë ndaj partnerit të Amant Josifit

Prokuroria e Përgjithshme e Bambergut, në Gjermani, ka depozituar zyrtarisht aktakuzën ndaj një 50-vjeçari të identifikuar si Mikheil B., i dyshuar si drejtuesi kryesor i rrjetit ndërkombëtar të mashtrimit online të njohur si “Milton Group”. Sipas autoriteteve gjermane, skema e investimeve të rreme ka shkaktuar një dëm financiar që llogaritet në rreth 230 milionë euro.

Lajmi bëhet i ditur nga media gjermane Frankenpost, e cila raporton se rrjeti ka vepruar për një periudhë të gjatë kohore përmes mashtrimeve me investime digjitale, duke shfrytëzuar call center-a në disa shtete evropiane dhe jo vetëm, përfshirë edhe Shqipërinë. Vetëm në hapësirën gjermanofolëse, më shumë se 1 000 persona dyshohet se kanë rënë viktimë e kësaj skeme mashtruese.

Autoritetet gjermane kujtojnë se më 8 dhe 9 nëntor 2022, në kuadër të një operacioni të përbashkët ndërkombëtar me Eurojust dhe Europol, SPAK ndërhyri në Shqipëri duke bastisur gjashtë call center-a të lidhur drejtpërdrejt me “Milton Group”, operacion nga i cili u arrestuan katër persona. Hetimet zbuluan se këto call center-a ishin në pronësi të tre kompanive të lidhura me biznesmenin Amant Josifi, i cili ka shërbyer më herët si këshilltar politik i Olta Xhaçkës gjatë periudhës kur ajo drejtonte Ministrinë e Mbrojtjes.

Sipas Prokurorisë së Bambergut, Mikheil B., shtetas izraelit dhe gjeorgjian, u arrestua në Armeni në gusht të vitit 2023 dhe u ekstradua në Gjermani në maj 2024. Aktualisht ai ndodhet në paraburgim, ndërsa procesi gjyqësor pritet të zhvillohet në Gjykatën Rajonale të Bambergut. Seanca e parë publike është caktuar për datën 15 janar dhe janë planifikuar gjithsej 12 seanca gjyqësore.

Nga viti 2014 deri në nëntor 2022, i pandehuri dyshohet se ka qenë pjesë qendrore e një grupi kriminal të strukturuar, i cili operonte call center-a në Shqipëri, Gjeorgji, Maqedoninë e Veriut dhe Ukrainë. Përmes platformave fiktive të tregtimit financiar online, viktimave u premtoheshin fitime të shpejta, ndërsa fondet e investuara përfundonin pothuajse tërësisht të humbura.

Vetëm një call center në Tiranë, i cili dyshohet se drejtohej nga Mikheil B. dhe kishte rreth 600 punonjës, ka shkaktuar dëme për qindra qytetarë nga Gjermania, Austria dhe Zvicra. Autoritetet gjermane theksojnë se shifra reale e dëmeve është shumë më e lartë sesa ajo e dokumentuar deri më tani, ndërsa i akuzuari dyshohet se ka përfituar personalisht rreth 29 milionë euro.

Zyra Qendrore për Kriminalitetin Kibernetik të Bavarisë e konsideron “Milton Group” si një nga rrjetet më të mëdha ndërkombëtare të mashtrimit online. Hetimet vijojnë edhe ndaj personave të tjerë të përfshirë në këtë skemë, në bashkëpunim me autoritetet e ndjekjes penale në Shqipëri, Gjeorgji dhe vende të tjera evropiane.