“Gjithçka zgjati një minutë. Autori pastroi gjakun nga biçaku dhe u largua i qetë”

Detaje të reja dhe tronditëse kanë dalë në dritë lidhur me ngjarjen e rëndë të ndodhur tre ditë më parë në Durrës, ku një 56-vjeçar sulmoi me mjet prerës vajzën e tij dhe kolegun e saj.

Një prej dëshmitarëve okularë, koleg i vajzës, Xhensila Ndoj, ka rrëfyer me detaje momentet dramatike të sulmit, duke theksuar se autori u largua nga vendngjarja me një qetësi shqetësuese.

Sipas dëshmisë së tij, Mikel Ndoj, pasi kreu sulmin, fshiu njollat e gjakut nga mjeti prerës dhe u largua pa shfaqur asnjë shenjë paniku apo tronditjeje. Ngjarja, sipas tij, zgjati vetëm pak çaste, por ishte e dhunshme dhe e papritur.

Dëshmitari foli në emisionin “Me zemër të hapur” edhe për një presion të vazhdueshëm që babai ushtronte ndaj vajzës së tij prej kohësh, duke u paraqitur shpesh në ambientet e punës dhe duke shfaqur sjellje posesive. Ai shtoi se situata kishte qenë e tensionuar prej vitesh dhe se konflikti familjar ishte i akumuluar.

Sipas tij, autori ndodhej në kushte të vështira jetese dhe kishte vështirësi serioze në komunikimin me të bijën, faktorë që, sipas dëshmitarit, mund të kenë ndikuar në përshkallëzimin e situatës. Ai theksoi gjithashtu se sulmi duket i planifikuar, pasi 56-vjeçari mbërriti në zyrë i përgatitur dhe nxori menjëherë mjetin prerës.

“Ai iku që aty duke pastruar biçakun, me një qetësi vrasësi, me hapa të ngadaltë. ..as shpejtë, as i traumatizuar. Iku andej nga u fsheh. Nuk vura re asnjë traumë. E gjithë ngjarja ndodhi për 1 minutë. U zunë, u kapën, i goditi dhe ai më pas u largua. Presioni i vazhdueshëm që ai ushtronte, vinte e takonte….i thoshte vajzës; është me imja. Një herë tjetër që kaloi te zyra, indiferenca e gocës ishte evidente. Ajo ishte situatë që është akumuluar. Është problem familjar i ndërthurur ndër vite. Ai ishte pa shtëpi dhe katandi dhe kjo pesha psikologjike që ka pasur, do e ketë çuar te kjo gjë. Ai nuk ka ditur që të komunikojë me vajzën e saj. Kjo ishte dinamika. Ne dëshmuam çdo gjë në polici. Ngjarja ishte e planifikuar, pasi ai erdhi te zyra dhe i nxori direkt biçakun.”, tha dëshmitari.

Të gjitha këto rrethana, sipas dëshmitarit, janë deklaruar pranë autoriteteve dhe janë pjesë e hetimeve që po vijojnë.