Padia e Rovena Gashit ndaj Arta Markut, kryeprokurorja i heq dhe burrin nga puna

Të tjera lëvizje në rradhët e Prokurorisë, që pas marrjes së detyrës nga Arta Marku. Është shkarkuar ditën e sotme drejtuesi i Prokurorisë së Elbasanit, Dritan Gina. Ky i fundit kishte rreth 1 vit e gjysmë që drejtonte Prokurorinë e Elbasanit.

Dritan Gina është bashkëshorti i Rovena Gashit, e cila deri pak ditë më parë mbante postin e drejtores së njësisë së dekriminalizimit dhe marrëdhënieve me jashtë, ndërsa ditën e sotme paditi për shkarkimin Kryeprokuroren Marku.

Në padinë drejtuar Gjykatës thuhet: “Vendimi për lirimin nga detyra, i pavlefshëm. Prokuroria e Përgjithshme ka uzurpuar funksionet e KLP-së.”

Në vendin e Gashit, Marku ka emëruar Arqile Koçën. Vendimi i fundit që u mor nga Gashi ishte kërkesa drejtuar KQZ-së për heqjen e mandatit për deputetët Aqif Rakipi dhe Gledion Rehovica.

Prokurori i Elbasanit pritet të reagojë pas pak për shkarkimin.