I mituri 11-vjeçar humb kontaktet me familjen e tij në Tiranë

Prej më shumë se 24 orësh, një fëmijë 11-vjeçar rezulton i zhdukur në Tiranë, duke alarmuar familjen dhe autoritetet.

I mituri ka humbur kontaktet me të afërmit paraditen e djeshme, rreth orës 09:00–10:00, dhe që nga ai moment nuk ka dhënë asnjë shenjë për vendndodhjen e tij.

Sipas familjarëve, hera e fundit kur është parë, 11-vjeçari ishte i veshur me rroba të zeza dhe atlete bardh e zi. Çdo përpjekje për ta kontaktuar ka rezultuar e pasuksesshme, ndërsa orët që kalojnë shtojnë ankthin e të afërmve.

Rasti është denoncuar në komisariatin përkatës në Tiranë dhe familja kërkon ndihmën e kujtdo që mund të ketë informacion. Çdo person që mund ta ketë parë fëmijën apo ka dijeni për lëvizjet e tij, ftohet të kontaktojë menjëherë autoritetet.