Përditësuar më 7 Mars 2026, 17:38

“Kur erdhi tek ne, tha ku paskam qenë”

Kryeministri Edi Rama ka deklaruar se në mazhorancë po bashkohen edhe figura që më parë kanë qenë pjesë e opozitës. Gjatë një komunikimi me qytetarët në Prrenjas, ai ironizoi protestat e opozitës dhe theksoi se gjithnjë e më shumë demokratë po i bashkohen qeverisë.

“Shqipëria nuk kthehet më mbrapa, do ta çojmë përpara me të gjithë demokratët që e gjejnë rrugën. Rrugën do ta hapim ne dhe nuk janë pak”, u shpreh Rama.

Në fjalën e tij, kryeministri përmendi edhe rastin e drejtueses së Agjencia Kombëtare e Rinisë, duke theksuar se ajo ka qenë më parë pjesë e strukturave të Partia Demokratike e Shqipërisë.

“Drejtuesja e Agjencisë së Rinisë ka qenë udhëheqëse e rinisë së PD-së dhe thotë: ‘Ku paskam qenë?’ Pse, a nuk e sheh që është mes njerëzish dhe jo mes qorrash”, deklaroi Rama.

Drejtoresha në fjalë është Sara Bodo, e cila sipas faqes zyrtare të institucionit drejton aktualisht Agjencinë Kombëtare të Rinisë.

Në vitin 2021, Bodo u prezantua publikisht si kryetare e Forumi Rinor i Partisë Demokratike në Vlorë. Në atë periudhë ajo ishte mbështetëse e ish-kryetarit të PD-së Lulzim Basha.

Sipas të dhënave zyrtare, Sara Bodo është emëruar në krye të Agjencisë Kombëtare të Rinisë në tetor të vitit 2025.

Në njoftimin e institucionit thuhet se ajo ka një formim akademik në Itali dhe në Mbretërinë e Bashkuar, si dhe përvojë në sektorin publik dhe privat. Gjithashtu theksohet angazhimi i saj me të rinjtë dhe shoqërinë civile.

“Agjencia Kombëtare e Rinisë mirëpret znj. Sara Bodo në cilësinë e saj zyrtare si drejtoreshë të institucionit, duke shënuar fillimin e një kapitulli të ri dhe të rëndësishëm për politikat rinore në vend”, thuhet në deklaratën zyrtare.

Institucioni thekson se nën drejtimin e saj do të vijojë puna për forcimin e rolit të të rinjve në zhvillimin social dhe ekonomik të vendit, duke u fokusuar në politika dhe programe që synojnë përfshirjen dhe mbështetjen e tyre.