Vdekja e Ali Khameneit, arrihet konsensusi për liderin e ri suprem

Sipas mediave shtetërore iraniane, brenda strukturave drejtuese të vendit është arritur një konsensus i gjerë për emrin e udhëheqësit të ri suprem të Iranit, pas vdekjes së Ali Khameneit, i cili sipas raportimeve humbi jetën pas sulmeve të ndërmarra nga Shtetet e Bashkuara dhe Izraeli në territorin iranian rreth një javë më parë.

Pas vdekjes së tij, autoritetet iraniane krijuan një këshill të përkohshëm drejtues me tre anëtarë, i cili po administron çështjet shtetërore deri në përzgjedhjen e liderit të ri suprem.

Ky këshill përbëhet nga:

• Masoud Pezeshkian, presidenti reformist i Iranit

• Gholamhossein Mohseni Ejei, kreu i sistemit gjyqësor dhe një figurë e njohur e linjës së ashpër

• Alireza Arafi, jurist dhe drejtues i organizatës paraushtarake Basij

Sipas sistemit politik iranian, udhëheqësi suprem zgjidhet nga Assembly of Experts, një organ i përbërë nga 88 dijetarë islamikë, të cilët përzgjidhen për besnikërinë e tyre ndaj sistemit të Republikës Islamike.

Një prej anëtarëve të këtij institucioni, Mohammadmehdi Mirbaqeri, deklaroi se shumica e anëtarëve kanë arritur tashmë një marrëveshje të gjerë për kandidatin që do të marrë postin më të lartë në hierarkinë politike dhe fetare të vendit.

Megjithatë, ai theksoi se ekzistojnë ende disa pengesa procedurale që duhet të zgjidhen përpara shpalljes së vendimit përfundimtar. Sipas mediave iraniane, brenda Asamblesë ka pasur një debat të vogël nëse vendimi duhet të merret gjatë një mbledhjeje zyrtare fizike të anëtarëve apo nëse emri i liderit të ri mund të shpallet edhe pa ndjekur këtë procedurë formale.

Procesi i përzgjedhjes së udhëheqësit suprem konsiderohet një nga vendimet më të rëndësishme për të ardhmen politike të Iranit, pasi ky post përfaqëson autoritetin më të lartë në vend dhe ka ndikim të drejtpërdrejtë në politikën e brendshme, ushtrinë dhe diplomacinë e Republikës Islamike.