Dyshohet se u vodhën në Europë dhe SHBA për t’u shitur në Shqipëri

Operacioni policor i koduar Stolen Line vijon me rezultate konkrete, teksa autoritetet kanë sekuestruar katër automjete luksoze dhe kanë proceduar penalisht dy persona, ndërsa dy të tjerë janë shpallur në kërkim.

Strukturat e Seksionit për Hetimin e Trafiqeve të Paligjshme pranë Drejtorisë Vendore të Policisë Tiranë, pas një pune hetimore të thelluar për goditjen e rrjeteve të trafikimit të mjeteve të vjedhura, kanë arritur të identifikojnë dhe të referojnë materialet përkatëse në organin e akuzës ndaj disa shtetasve të përfshirë.

Në këtë kuadër, është nisur procedim penal ndaj shtetasit S. C., i cili dyshohet se ka futur në vend një automjet tip Jeep të vjedhur në Itali, me synim tregtimin e tij në tregun vendas.

Po ashtu, nën hetim është vënë edhe shtetasi E. Ç., i cili dyshohet se ka trafikuar një automjet tip Range Rover, i raportuar si i vjedhur në Shtetet e Bashkuara të Amerikës.

Ndërkohë, në kërkim janë shpallur shtetasit E. J. dhe R. R. Sipas hetimeve, i pari dyshohet se ka trafikuar një automjet tip BMW të vjedhur në Gjermani, ndërsa i dyti një automjet tip Seat Cupra të vjedhur në Itali. Të dy mjetet dyshohet se do të shiteshin në Shqipëri.

Automjetet e sekuestruara, me një vlerë të përgjithshme që arrin rreth 200 mijë euro, janë marrë në cilësinë e provës materiale, ndërsa hetimet vijojnë për dokumentimin e plotë të këtij aktiviteti kriminal.