Një ngjarje e rëndë ka tronditur Firencen, ku është gjetur i pajetë një burrë në një stacion tramvaji në zonën e Arcipressit, ndërsa rrethanat e vdekjes vijojnë të mbeten të paqarta.
Viktima është identifikuar si një shtetas shqiptar rreth 50 vjeç, por identiteti i tij ende nuk është bërë publik nga autoritetet. Trupi u gjet në një hapësirë publike, çka ka ngritur dyshime për mënyrën se si ka ndodhur ngjarja.
Hetimet kanë marrë një tjetër drejtim pas zbulimit se burri ishte liruar nga burgu vetëm një ditë para se të gjendej i pajetë. Ai kishte qenë i ndaluar në Burgun e Sollicciano, ndërsa më herët rezulton të ketë pasur lidhje me zonën e Viterbos.
Sipas mediave italiane, ai është transportuar me urgjencë në Humanitas Firenze, ku mjekët kanë tentuar ta rikthejnë në jetë, por pa sukses, duke e shpallur të vdekur.
Rreth orës 10:00, prokurori ka urdhëruar nisjen e hetimeve të thelluara për të sqaruar shkaqet e vdekjes, duke mos përjashtuar asnjë pistë. Ndërkohë, autoritetet kanë sekuestruar pamje filmike dhe po mbledhin dëshmi për të rindërtuar momentet e fundit të jetës së viktimës.
Për shkak të operacioneve hetimore, linja e tramvajit në zonë u pezullua për disa orë, duke shkaktuar edhe ndërprerje në qarkullimin urban.
