Skënder Hita ‘zbarkon’ në Korçë, zbardhen porositë për strukturat

Drejtori i Përgjithshëm i Policisë së Shtetit, Skënder Hita, zhvilloi një takim pune në qytetin e Korçës, në ambientet e Drejtorisë Vendore të Policisë, ku morën pjesë drejtuesit kryesorë të kësaj strukture, si dhe shefat e komisariateve dhe sektorëve përkatës.

Gjatë mbledhjes, e cila zgjati rreth një orë, u analizuan në detaje një sërë çështjesh që lidhen me situatën e rendit dhe sigurisë në territor. Burime për mediat bëjnë me dije se fokusi kryesor i diskutimeve ishte forcimi i masave për parandalimin dhe goditjen e veprimtarive kriminale.

Në veçanti, drejtori Hita ka kërkuar intensifikimin e punës për identifikimin dhe goditjen e rasteve të kultivimit dhe shpërndarjes së lëndëve narkotike, duke theksuar rëndësinë e reagimit të shpejtë dhe bashkëpunimit ndërmjet strukturave përkatëse.

Një tjetër prioritet i ngritur gjatë takimit ishte evidentimi dhe ndjekja e individëve të përfshirë në grupe kriminale, me qëllim parandalimin e aktivitetit të tyre dhe rritjen e sigurisë publike.

Po ashtu, vëmendje e veçantë iu kushtua fenomenit të armëmbajtjes pa leje. Në këtë aspekt, u kërkua rritja e kontrolleve në terren, me fokus të posaçëm institucionet arsimore dhe zonat me ndjeshmëri të lartë, për të garantuar një mjedis sa më të sigurt për qytetarët.