Petro Koçi i bashkohet kritikave të Spiropalit

Ish-deputeti socialist, Petro Koçi, ka reaguar me tone të forta ndaj zhvillimeve të fundit brenda kësaj force politike, duke ngritur shqetësime për mënyrën e funksionimit të saj dhe për rolin e individëve që, sipas tij, e përdorin partinë për interesa personale.

Në një postim të gjatë, ai ndan qartë diferencën mes atyre që e shohin Partinë Socialiste si një vlerë për t’u ndërtuar dhe atyre që e konsiderojnë si mjet për përfitime personale. Sipas Koçit, këta të fundit jo vetëm që dëmtojnë imazhin e forcës politike, por edhe deformojnë proceset e brendshme vendimmarrëse.

Kritika ndaj “pushtetit të mbyllur”

Koçi akuzon se individë të caktuar brenda partisë shmangin rolin e anëtarësisë dhe përqendrojnë vendimmarrjen në duart e një grupi të kufizuar. Ai i përshkruan këto sjellje si arrogancë pushteti dhe paralajmëron për pasojat që sjellin në funksionimin demokratik të partisë.

Sipas tij, është e domosdoshme që të rishikohet balanca e pushtetit brenda strukturave të PS-së, duke i dhënë anëtarësisë një rol më të madh në vendimmarrje. Ai propozon që të paktën gjysma e ndikimit të delegatëve të kalojë tek baza e partisë, në mënyrë që vendimet të reflektojnë më mirë vullnetin e anëtarëve.

Thirrje për veprim kundër korrupsionit

Një pjesë e rëndësishme e reagimit lidhet me luftën kundër korrupsionit. Koçi thekson se qeveria nuk duhet të mbështetet vetëm tek institucionet e drejtësisë si SPAK dhe GJKKO, por duhet të ndërhyjë vetë në mënyrë aktive.

Ai kërkon masa konkrete administrative ndaj çdo zyrtari që rezulton me shkelje, veçanërisht në aspektin financiar, duke theksuar rëndësinë e kontrolleve dhe auditimeve shtetërore.

Mesazh për kritikët brenda partisë

Koçi u drejtohet edhe zërave kritikë brenda PS-së, duke i ftuar që të ruajnë etikën dhe të tregojnë vetëpërmbajtje. Sipas tij, kritika duhet të jetë konstruktive dhe e matur, në mënyrë që të mos krijohen hapësira për individë të korruptuar që të përfitojnë nga situata.

Një sinjal politik brenda PS-së

Vëmendje ka tërhequr edhe fakti që reagimi i tij është pëlqyer nga Elisa Spiropali, e cila ka pasur përplasje të hapura me kryeministrin Edi Rama. Ky detaj është interpretuar si një tregues i tensioneve të brendshme që po shfaqen në radhët e socialistëve.

Në përfundim, Koçi shprehet se Partia Socialiste ka potencialin për t’u vetëkorrigjuar dhe për të vijuar përpara, por kjo kërkon reflektim të brendshëm dhe një qasje më të hapur ndaj anëtarësisë dhe përgjegjshmërisë institucionale.

Postimi i Petro Koçit:

Te duash Partine Socialiste eshte ndryshe nga te te duhet Partia Socialiste.

Ata qe e duan perpiqen ta permiresojne, ta perfeksionojne sepse u dhembin perpjekjet, vuajtjet, sakrificat, kontributet e mijera militanteve te saj nder vite.

Ata, te cileve thjesht u duhet partia per karriere e per tu pasuruar shpesh e vjedhin pushtetin e saj, e shperdorojne dhe e baltosin moralin e saj publik.

Nese punet nuk ecin si duhet ata qe e duan PS ne perpiqen te nderhyjne duke analizuar, keshilluar e propozuar.

Te korruptuarit ose tradhetaret, e votebesimit popullor ndaj PS perpiqen ti mbulojne problemet apo dukurite regresiste. Ata ndertojne skema qe shmangin pushtetin e anetaresise se partise ne proceset vendimmarrese.

Sillen me arrogancen e nje pushteti te deleguar nga lart. Ata vendosin motin politik ne parti. Sillen si bajraktare te dikurshem por te veshur me Armani ama.

Prandaj kam kerkuar qe te balancohet marredhenia duke dhene anetaresise te pakten gjysmen e pushtetit te te deleguarve. Republika t’u hiqet nga duart drejtoreve e te deleguarve e ti dorezohet sovranit e perfaqesuesve te tij.

Qeveria te mos prese qe korrupsionin ta luftoje vetem SPAK e GJKKO, por te nderhyje me vendosmeri me masa administrative nda cdo zyrtari qe rezulton me shkelje sidomos financiare nga kontrollet e KLSH apo auditet shteterore.

Partia te behet me kolegjiale ne vendimmmarrjet perfaqesuese dhe te respektohet ne menyre institucionale vleresimi i  anetaresise se PS per ceshtjet e rendesishme politike.

Qasja institucionale te synoje shnderrimin e partise ne nje instrument demokratik te pjesemarrjes se qytetareve ne qeverisje gjate gjithe periudhes se ushtrimit te mandatit.

Zerat kritike ne cdo rast te ruajne etiken dhe te sigurojne vetepermbajtje konstruktive ne menyre qe te mos u lene hapesire te korruptuarve te mbajne flamurin e parimit te unitetit.

PS i ka te gjitha energjite, pervojen dhe mencurine qe te vetekorigjohet ne cdo aspekt, te ece perpara ne nje qeverisje te suksesshme qe realizon me merite integrimin europian te vendit dhe qe sfidon nje opozite mjerane prapakthimi ne perballjet e ardhshme elektorale.