Kontrolle në burgun e Fierit, gjenden 10 celularë, alkool dhe drogë

Kontrollet e intensifikuara në burgun e Fierit kanë nxjerrë në pah një sërë shkeljesh, duke çuar në sekuestrimin e disa sendeve të ndaluara brenda ambienteve të institucionit penitenciar.

Sipas burimeve zyrtare, gjatë operacioneve të zhvilluara nga Forcat Operacionale të Drejtorisë së Përgjithshme të Burgjeve, në zonën e jashtme pranë Godinës “A” janë zbuluar dhe bllokuar 10 telefona celularë, po aq karikues, si dhe disa bidona që dyshohet se përmbanin alkool. Gjithashtu, në dy pika të ndryshme janë gjetur edhe sasi të dyshuara të lëndëve narkotike.

Autoritetet kanë dokumentuar rastin përmes raporteve përkatëse dhe procesverbaleve të sekuestrimit, ndërsa çështja i është referuar Agjencisë së Mbikëqyrjes në Sistemin e Ekzekutimit të Vendimeve Penale për ndjekje të mëtejshme procedurale.

Në një episod tjetër brenda të njëjtit institucion, gjatë një kontrolli rutinë me skaner, një i dënuar me inicialet A.M. është kapur me pesë qese të vogla të dyshuara me lëndë narkotike, të cilat i kishte fshehur në veshje. Pas zbulimit, ai është izoluar në sektorin e veçimit, ndërsa janë vënë në dijeni strukturat përgjegjëse për vijimin e hetimeve.

Kontrollet në IEVP Fier janë pjesë e një plani më të gjerë masash për rritjen e sigurisë dhe goditjen e tentativave për futjen e sendeve të paligjshme në institucionet e vuajtjes së dënimit.