Gjendet i pajetë punonjësi i Gardës së Republikës

Një ngjarje e rëndë është regjistruar mëngjesin e kësaj të marte në Tiranë, ku punonjësi i Gardës së Republikës, Albert Gradica, është gjetur pa shenja jete në banesën e tij.

Sipas njoftimit paraprak të policisë, “rreth orës 07:05, në një banesë në zonën e Rrugës së Dibrës, është konstatuar i pajetë shtetasi A. G., rreth 42 vjeç”.

Burimet bëjnë me dije se 42-vjeçari dyshohet se ka kryer vetëvrasje me armën e shërbimit, në shtëpinë e tij. Dyshohet gjithashtu se në momentin e ngjarjes në banesë kanë qenë edhe familjarët e tij.

Sipas informacioneve paraprake, 42-vjeçari kishte shfaqur kohët e fundit shenja të depresionit, të lidhura me probleme familjare, ekonomike dhe shëndetësore.

Autoritetet vijojnë hetimet për të zbardhur plotësisht rrethanat e kësaj ngjarjeje të rëndë.