Dosja e SPAK: Takime nga Majorka në Aruba për kokainë dhe investime

Një rrjet i gjerë takimesh në disa vende të Evropës dhe më gjerë është dokumentuar nga autoritetet belge dhe është përfshirë në hetimin e Prokurorisë së Posaçme ndaj grupit të dyshuar kriminal të drejtuar nga Alfredo Hamzai.

Sipas materialeve hetimore, këto takime janë zhvilluar në shtete si Spanja, Monako, Belgjika, Gjermania dhe Aruba, duke krijuar një panoramë të qartë të lëvizjeve ndërkombëtare të personave të përfshirë.

Në qendër të këtyre aktiviteteve dyshohet të jetë Artur Shehu, i cili përmendet si një nga figurat kyçe në organizim. Ai akuzohet se ka marrë pjesë në takime ku diskutohej dhe koordinohej blerja, transporti dhe futja në tregun evropian e sasive të mëdha të kokainës.

Në dokumentet e hetimit përmenden edhe emra të tjerë të përfshirë në nivele të ndryshme, mes tyre Adrian Rama, Elton Memeti, Erjon Rama, Leonard Bishaj, Bujar Shehaj, Pëllumb Petritaj dhe vetë Hamzai.

Një seri takimesh të rëndësishme janë zhvilluar në Majorka gjatë vitit 2019, ku u mblodhën disa nga figurat kryesore të grupit. Në këto takime kanë qenë të pranishëm edhe persona si Toni Lipaj, Arben Ismailaj dhe Klodjan Jahja, ndërsa në disa raste është raportuar pjesëmarrja e biznesmenit kosovar Bashkim Osmani.

Këto zhvillime paraprinë një operacion të rëndësishëm të autoriteteve në Barcelonë në janar të vitit 2020, ku u sekuestruan 441 kilogramë kokainë dhe u arrestua një i afërm i drejtuesit të grupit.

Një tjetër takim me rëndësi është raportuar në Monako, ku sipas hetimeve është diskutuar organizimi i trafikut të kokainës nga Amerika Latine, konkretisht nga Surinami, drejt tregut evropian.

Por hetimet nuk kufizohen vetëm në trafikun e lëndëve narkotike. Autoritetet belge kanë raportuar gjithashtu për përpjekje të dyshuara për pastrim parash përmes investimeve në sektorin e pasurive të paluajtshme në Shqipëri.

Një nga episodet e dokumentuara është zhvilluar në Antverp në shkurt të vitit 2019, ku disa prej anëtarëve të grupit dyshohet se kanë diskutuar konkretisht për projekte investimi.

Po ashtu, një tjetër element që ka tërhequr vëmendjen e hetuesve është qëndrimi i disa prej të dyshuarve në Aruba gjatë janarit të vitit 2019. Sipas informacioneve të referuara, gjatë kësaj periudhe janë zhvilluar takime që dyshohet se kanë përfshirë edhe kontakte me zyrtarë të lartë shqiptarë.

Megjithatë, në këtë fazë të hetimit nuk ka prova konkrete që identifikojnë individë specifikë nga radhët e funksionarëve publikë apo që vërtetojnë përfshirjen e tyre në aktivitete të paligjshme.

Në përfundim të analizës së deritanishme, hetuesit belgë e konsiderojnë Artur Shehun si një nga figurat drejtuese të organizatës, me rol të rëndësishëm në koordinimin e trafikut të kokainës dhe menaxhimin e investimeve të dyshuara në pasuri të paluajtshme.