Plas sherri në GJKKO, vëllezërit Bushgjokaj dhunojnë Petrit Çakrin

Një incident i rëndë dhe i pazakontë është regjistruar në ambientet e Gjykatës së Posaçme Kundër Korrupsionit dhe Krimit të Organizuar, duke ndërprerë përkohësisht zhvillimin normal të një seance gjyqësore.

Sipas informacioneve të siguruara, gjatë procesit ka shpërthyer një konflikt fizik mes disa të pandehurve të vendosur në kafazin e sigurisë. Situata ka degraduar me shpejtësi në përplasje të dhunshme, duke krijuar tension dhe kaos brenda sallës.

Ngjarja lidhet me çështjen e rrëmbimit dhe vrasjes së Renis Dobrës, ndërsa burime pranë hetimit bëjnë me dije se shkaku i konfliktit dyshohet të ketë qenë një përplasje mes vëllezërve Bushgjokaj dhe Petrit Hoxhës, i njohur ndryshe si Çakri. Pretendohet se përplasja erdhi pas akuzave të drejtpërdrejta ndaj këtij të fundit për bashkëpunim dhe deklarime që kanë dëmtuar pozitat e tyre në proces.

Gjatë incidentit, Hoxha është goditur fizikisht dhe është përplasur me forcë, ndërsa ndërhyrja e menjëhershme e forcave të sigurisë ka shmangur përshkallëzimin e mëtejshëm të situatës. Në përpjekje për të neutralizuar konfliktin, janë lënduar edhe tre efektivë të togës së shoqërimit të të burgosurve.

Për disa minuta, salla e gjyqit është kthyer në një ambient tensioni të lartë, duke detyruar ndërprerjen e përkohshme të seancës. Autoritetet po punojnë për zbardhjen e plotë të rrethanave, ndërsa priten masa të reja disiplinore dhe penale ndaj personave të përfshirë në incident.