Biseda për kokainë, investime në resorte dhe biznes në Shqipëri

Për herë të parë janë bërë publike pamje nga një takim i zhvilluar në Aruba, i cili dyshohet se ka shërbyer si pikë koordinimi mes grupeve kriminale shqiptare dhe bashkëpunëtorëve të tyre ndërkombëtarë. Ky takim ka qenë nën mbikëqyrjen e autoriteteve ligjzbatuese nga Belgjika, Spanja dhe Holanda, të cilat po hetojnë aktivitetet e lidhura me trafikun e narkotikëve dhe pastrimin e parave.

Në materialet e publikuara, përveç personave të dyshuar si pjesë e rrjeteve kriminale, shfaqen edhe individë me funksione publike në Shqipëri. Sipas burimeve hetimore, këta zyrtarë dyshohet se kanë lehtësuar procedura të ndryshme administrative në favor të grupeve kriminale, duke mundësuar ndërhyrje në zona të mbrojtura dhe dhënie lejesh ndërtimi në territore ku kufizimet ligjore e ndalonin zhvillimin urban.

Hetimet janë në zhvillim e sipër dhe pritet që struktura e posaçme kundër korrupsionit dhe krimit të organizuar të ndërmarrë hapa konkretë në ditët në vijim. Burime pranë procesit bëjnë me dije se një pjesë e zyrtarëve të përfshirë mund të thirren për t’u marrë në pyetje, ndërsa do të kryhen verifikime të detajuara mbi procedurat e ndjekura për miratimin e lejeve të ndërtimit.

Fokusi i hetimeve përfshin disa nga zonat më të rëndësishme të zhvillimit bregdetar dhe urban në vend, përfshirë Himarën, Dhërmiun, Palasën, Tiranën, Vlorën, Durrësin, Qerretin dhe Elbasanin. Autoritetet synojnë të zbardhin nëse këto leje janë dhënë në përputhje me ligjin apo në funksion të interesave të paligjshme.

Zhvillimet e fundit pritet të hedhin më shumë dritë mbi një nga çështjet më të ndjeshme që lidhen me ndërthurjen e krimit të organizuar me institucionet publike.