Fitime marramendëse deri në 700,000 euro

Një operacion i gjerë i autoriteteve greke ka çuar në goditjen e një organizate të strukturuar kriminale që vepronte në trafikun e lëndëve narkotike në ishullin turistik të Mykonos dhe në zonën e Atikës. Aksioni përfundoi me arrestimin e gjashtë personave të dyshuar si pjesë e rrjetit.

Sipas burimeve zyrtare, ndërhyrja policore u realizua pas një hetimi disa mujor, i cili kishte nisur në mesin e prillit 2026. Gjatë kësaj periudhe, hetuesit përdorën metoda të avancuara, përfshirë përgjime, analizë të komunikimeve dhe verifikime të detajuara të të dhënave, për të dokumentuar aktivitetin e grupit.

Nga të dhënat e mbledhura rezulton se organizata funksiononte me strukturë të mirëpërcaktuar dhe ndarje të qartë rolesh, duke shfrytëzuar kryesisht zonat me fluks të lartë turistësh për shpërndarjen e drogës.

Në krye të rrjetit dyshohet se qëndronte një 37-vjeçar me origjinë shqiptare, i cili koordinonte të gjithë zinxhirin e aktivitetit kriminal, nga sigurimi i furnitorëve, organizimi i transportit dhe magazinimi, deri te shpërndarja dhe menaxhimi i të ardhurave.

Krahu i tij i djathtë ishte një 38-vjeçar grek, i cili merrej me shpërndarjen në terren dhe kontaktet me klientët, duke pasur rol kyç në funksionimin e përditshëm të rrjetit.

Në strukturë përfshihej edhe një 25-vjeçar, përgjegjës për gjetjen e klientëve dhe realizimin e transaksioneve të vogla, si dhe një shtetas rumun 38 vjeç, i cili kujdesej për ruajtjen e lëndëve narkotike dhe administrimin e pikave të fshehjes.

Ndërkohë, në pranga ka përfunduar edhe një grua 31-vjeçare, e kapur në posedim të drogës dhe e dyshuar për lidhje me grupin.

Hetimet zbuluan se anëtarët e organizatës kishin ngritur edhe një aktivitet të ligjshëm në dukje – një kompani transporti me furgonë në Mykonos – e cila përdorej si mbulesë për lëvizjen dhe shpërndarjen e drogës, si dhe për të justifikuar udhëtimet e shpeshta.

Gjatë kontrolleve të ushtruara në banesa dhe ambiente të përdorura si baza në Mykonos, Pire dhe Perama, policia sekuestroi sasi të konsiderueshme substancash narkotike, përfshirë kokainë, MDMA, kanabis, ketaminë dhe substanca të tjera sintetike, si dhe qindra tableta farmaceutike.

Në të njëjtën kohë u konfiskuan pajisje të ndryshme që shërbenin për përpunimin dhe shpërndarjen e drogës, mjete transporti, telefona celularë, para në vlerë mbi 100 mijë euro dhe dollarë, si dhe materiale për paketim.

Sipas autoriteteve, çmimet e shitjes së drogës në tregun lokal ishin të larta, duke reflektuar kërkesën e madhe në zonat turistike. Nga aktiviteti i paligjshëm, grupi dyshohet se ka gjeneruar mbi 700 mijë euro fitime.

Operacioni konsiderohet një goditje e rëndësishme ndaj trafikut të drogës në zonat turistike të Greqisë, ndërsa hetimet për zbardhjen e plotë të rrjetit vijojnë.