Zjarr në lagjen “15 Tetori” në Vlorë, flakët rrezikojnë banesat

Një vatër zjarri është regjistruar mëngjesin e kësaj të marte në lagjen “15 Tetori” në qytetin e Vlorës, duke shkaktuar shqetësim te banorët e zonës. Flakët kanë përfshirë një sipërfaqe me pisha dhe shkurre, shumë pranë disa banesave, duke rritur rrezikun për përhapje të mëtejshme.

Sipas informacioneve paraprake, dyshohet se zjarri mund të jetë shkaktuar qëllimisht, me synim pastrimin e territorit nga barishtet dhe bimësia e dendur. Megjithatë, për shkak të erës, flakët janë përhapur me shpejtësi, duke e bërë më të vështirë kontrollin e situatës.

Në vendngjarje kanë mbërritur menjëherë forcat zjarrfikëse, të cilat po punojnë për izolimin dhe shuarjen e zjarrit, në mënyrë që të shmanget rreziku për banesat përreth.

Ky është rasti i dytë i një vatre zjarri në këtë zonë brenda pak ditësh, duke ngritur shqetësime serioze për sigurinë dhe mundësinë e zjarrvënieve të përsëritura në territorin e Vlorës.