Dyshime për pastrim parash për llogari të grupit të “Arubës”

Një zhvillim i ri ka ardhur nga Gjykata e Posaçme kundër Korrupsionit dhe Krimit të Organizuar, e cila ka vendosur të zbusë masën e sigurisë për Besnik Myftarin. Nga dita e enjte, ai nuk do të qëndrojë më në “arrest shtëpie”, por do të hetohet në gjendje të lirë, nën masën “detyrim paraqitjeje”.

Vendimi u mor pas shqyrtimit të kërkesës së paraqitur nga vetë Myftari, ndërsa gjykata pranoi ndryshimin e masës së mëparshme shtrënguese, e cila ishte vendosur në mungesë dhe u ekzekutua vetëm disa javë më parë.

Sipas dosjes hetimore, Myftari dyshohet për përfshirje në pastrim parash, kryesisht të ardhura nga aktiviteti i narkotrafikut. Hetuesit pretendojnë se përmes këtyre fondeve ai ka financuar dhe ngritur disa media, përfshirë televizione, radio dhe portale lajmesh.

Në vendimin e saj, gjykata ka përcaktuar që i hetuari duhet të paraqitet rregullisht pranë oficerëve të policisë gjyqësore në Byronë Kombëtare të Hetimit. Konkretisht, ai është i detyruar të paraqitet çdo të premte të tretë të muajit, në orën 12:00, në kuadër të procedimit penal që po zhvillohet nga Prokuroria e Posaçme.

Ndryshimi i masës së sigurisë është bërë në përputhje me dispozitat e Kodit të Procedurës Penale, duke kaluar nga “arrest në shtëpi” në një masë më të lehtë, që lejon hetimin në gjendje të lirë, por nën mbikëqyrje.

Prokuroria e Posaçme kundër Korrupsionit dhe Krimit të Organizuar është ngarkuar me ekzekutimin e vendimit, ndërsa palët kanë të drejtë ta ankimojnë atë brenda 5 ditëve në Gjykatën e Posaçme të Apelit.

Hetimet ndaj Myftarit vijojnë, ndërsa pritet që në vijim të dalin në dritë detaje të tjera mbi aktivitetin e dyshuar dhe rrjetin e mundshëm të përfshirë.

V E N D I M“NË EMËR TË REPUBLIKËS”

NR. AKTI 509

NR. VENDIMI

VENDOSI:

Pranimin e kërkesës së kërkuesit Besnik Myftari.

Zëvendësimin e masës së sigurimit personal me karakter shtrëngues “Arrest në shtëpi”, parashikuar nga neni 237 i K.Pr. Penale ndaj kërkuesit Besnik Myftari, vendosur me vendimin nr. 31, datë 10.06.2026, të Gjykatës së Posaçme të Shkallës së Parë për Korrupsionin dhe Krimin e Organizuar, Tiranë, konfirmuar me vendimin nr. 49, datë 19.06.2026, të të njëjtës gjykatë, me masën e sigurimit shtrënguese me karakter personal “Detyrimi për t’u paraqitur në policinë gjyqësore”, parashikuar nga neni 234 i K.Pr. Penale.

Urdhërohet personi nën hetim, Besnik Myftari, që të paraqitet para oficerëve të policisë gjyqësore pranë Byrosë Kombëtare të Hetimit, të cilët po kryejnë veprime hetimore në kuadër të procedimit penal nr. 287/1 të vitit 2021 të Prokurorisë së Posaçme, të premten e tretë të çdo muaji, në orën 12:00.

Për ekzekutimin e këtij vendimi urdhërohet Prokuroria e Posaçme kundër Korrupsionit dhe Krimit të Organizuar, Tiranë.

Shpenzimet gjyqësore mbeten siç janë bërë.

Kundër vendimit mund të bëhet ankim në Gjykatën e Posaçme të Apelit për Korrupsionin dhe Krimin e Organizuar, Tiranë, brenda 5 (pesë) ditëve, duke filluar ky afat nga e nesërmja e njoftimit të vendimit të arsyetuar të gjykatës.

U shpall në Tiranë, sot, më 16 korrik 2026.