nga dosja e AKSHI-t

Nga redaksia e Publik.al

Pas vilave luksoze, apartamenteve, llogarive bankare, jahtit, koleksionit të verërave dhe avionit privat, hetimet e SPAK dhe autoriteteve franceze kanë nxjerrë në dritë një tjetër pasuri të nivelit të lartë që lidhet me dosjen e tenderëve të AKSHI-t: një kështjellë historike në Francë me vlerë rreth 2.6 milionë euro.

Në njoftimin zyrtar të SPAK bëhet me dije se, në bashkëpunim me autoritetet franceze, janë identifikuar llogari bankare me mbi 2 milionë euro, dy apartamente, automjete dhe blerja e një kështjelle në departamentin Oise, me vlerë rreth 2.6 milionë euro.

Dokumentet publike çojnë te Château d’Auteuil

Verifikimet në regjistrat publikë francezë identifikojnë si pronë që përputhet me të dhënat e SPAK Château d’Auteuil, një rezidencë historike në komunën Berneuil-en-Bray, rreth një orë larg Parisit.

Përputhja mbështetet në disa elementë:

• prona ndodhet në departamentin Oise (60), siç përmendet nga SPAK;
• databazat franceze regjistrojnë shitjen e saj më 30 dhjetor 2024 për 2.612.200 euro, pothuajse identike me shumën e përmendur në njoftimin e SPAK;
• në rubrikën “Mentions légales” të faqes zyrtare të kështjellës figuron emri “Ermal Beqiri” si botues i faqes, me adresën e vetë Château d’Auteuil.

Ky element përbën një indicie të rëndësishme, por nuk është, në vetvete, provë juridike e pronësisë. Çështja mbetet objekt i hetimeve të autoriteteve shqiptare dhe franceze.

Një monument historik francez

Château d’Auteuil është një nga rezidencat historike të rajonit Oise.

Pjesët më të vjetra të saj datojnë nga fundi i shekullit XVI, ndërsa pamjen aktuale e mori gjatë shekullit XIX. Ndërtesa është ngritur në stilin Louis XIII, me fasada karakteristike prej tullash të kuqe dhe çati prej guri natyror.

Kompleksi është i rrethuar nga park dhe hendeqe mbrojtëse, ndërsa fasadat dhe çatitë gëzojnë statusin e monumentit historik të mbrojtur nga shteti francez.

Nga viti 2003 prona iu nënshtrua një restaurimi të plotë, pasi u ble nga Pol Thomas de La Pintière dhe Sabine Darondeau, të cilët investuan rreth 1 milion euro për ta kthyer në një rezidencë turistike për evente, dasma dhe akomodim.

Sipas faqes zyrtare, mbi 70 për qind e ambienteve janë restauruar duke respektuar karakterin historik të ndërtesës.

Transaksioni prej 2.612.200 euro

Regjistrat francezë të pasurive të paluajtshme tregojnë se më 30 dhjetor 2024 Château d’Auteuil u shit për 2.612.200 euro.

Shuma përputhet pothuajse plotësisht me atë të përmendur nga SPAK për blerjen e një kështjelle në departamentin Oise.

Më herët, rezidenca kishte qenë edhe në pronësi të biznesmenes franko-libaneze Mouna Ayoub, një emër i njohur i jet-set-it francez.

Dosja e AKSHI-t

Ermal Beqiri është një nga personat ndaj të cilëve SPAK ka caktuar masën e sigurisë “arrest në burg”, në kuadër të hetimeve për skemën e dyshuar kriminale të tenderëve të AKSHI-t.

Ai hetohet për disa vepra penale, mes tyre:

• grup i strukturuar kriminal;
• pastrim parash;
• korrupsion aktiv;
• shkelje e barazisë në tendera;
• konkurrencë e paligjshme;
• heqje e paligjshme e lirisë.

Sipas SPAK, Beqiri ishte shpallur në kërkim ndërkombëtar që në dhjetor 2025.

Më 24 korrik 2026, ai u arrestua në Francë pasi hyri me një avion të lehtë në hapësirën ajrore të kufizuar mbi centralin bërthamor të Penly. Gjykata franceze vendosi mbajtjen e tij në paraburgim për qëllime ekstradimi drejt Shqipërisë.

Gjatë kontrolleve të zhvilluara në Francë, autoritetet sekuestruan materiale dhe dokumente që, sipas SPAK, paraqesin interes për procedimin penal, ndërsa hetimet financiare vijojnë për identifikimin dhe sekuestrimin e pasurive të tjera të dyshuara si produkt i veprimtarisë kriminale.