Mori peng dhe ngacmoi seksualisht të miturin, arrestohet 31-vjeçari

Një ngjarje e rëndë është regjistruar në Tiranë, ku një 31-vjeçar ka përfunduar në pranga pas një kallëzimi të bërë nga familjarët e një të mituri.

Sipas burimeve zyrtare, efektivët e Komisariatit Nr. 4 kanë arrestuar shtetasin J.A, i dyshuar për veprat penale “ngacmim seksual” dhe “heqje e paligjshme e lirisë”.

Ngjarja dyshohet të ketë ndodhur në zonën e rrugës “Bardhyl”, ku 31-vjeçari, sipas hetimeve paraprake, ka mbajtur të mbyllur në banesën e tij një 13-vjeçar për disa orë. Dyshohet se i mituri është mbajtur kundër vullnetit të tij nga mbrëmja e 23 korrikut deri në orët e para të 24 korrikut.

Alarmi është dhënë nga familjarët, të cilët pasi konstatuan mungesën e fëmijës, iu drejtuan menjëherë policisë duke bërë kallëzim.

Gjatë marrjes në pyetje, i mituri ka dhënë dëshminë e tij në prani të prindit dhe një psikologu, duke deklaruar se gjatë kohës që ndodhej në banesën e të dyshuarit është përballur me ngacmime seksuale.

Pas mbledhjes së provave dhe verifikimeve përkatëse, policia arriti të lokalizojë dhe arrestojë 31-vjeçarin më 2 gusht.

Ndërkohë, hetimet vijojnë nën drejtimin e Prokurorisë, me qëllim zbardhjen e plotë të rrethanave dhe dokumentimin e plotë ligjor të kësaj ngjarjeje të rëndë.