Parandalohet sherri masiv mes të miturve, procedohen 28 të mitur

Një konflikt mes disa grupeve të miturish është parandaluar nga Policia e Tiranës në zonën e Kombinatit, pas marrjes së informacionit se të rinjtë po përgatiteshin të përplaseshin me njëri-tjetrin.

Ndërhyrja e menjëhershme e efektivëve të Komisariatit të Policisë Nr. 6, në bashkëpunim me Forcën e Posaçme “Shqiponja”, bëri të mundur shmangien e konfliktit dhe shoqërimin e të miturve në ambientet e komisariatit.

Ngjarja u evidentua në rrugën “Llambi Bonata”, ku shërbimet e policisë lokalizuan disa grupe të miturish, të cilët dyshohej se do të përfshiheshin në një konflikt.

Sekuestrohen thika, kaçavida dhe maska

Gjatë kontrollit fizik të të miturve, policia gjeti dhe sekuestroi disa armë të ftohta dhe mjete të mprehta, përfshirë thika dhe kaçavida.

Në cilësinë e provës materiale u sekuestruan gjithashtu disa maska.

Në total, autoritetet kanë sekuestruar 5 armë të ftohta/mjete të mprehta.

Procedohen 28 të mitur

Pas shoqërimit në komisariat dhe kryerjes së veprimeve procedurale, 28 të mitur, të moshave nga 13 deri në 17 vjeç, janë proceduar penalisht në gjendje të lirë.

Procedurat ndaj tyre janë kryer në prani të prindërve dhe psikologëve, ndërsa pas komunikimit me prokurorin janë ndërmarrë veprimet përkatëse ligjore.

Policia deklaron se ndërhyrja në kohë parandaloi përshkallëzimin e situatës dhe një përplasje të mundshme mes grupeve të të rinjve.

Materialet procedurale i janë referuar Prokurorisë, e cila do të vijojë veprimet e mëtejshme për dokumentimin dhe vlerësimin e rastit.

Njoftimi i policisë:

Tiranë/Ndërhyrja e menjëhershme e Policisë, parandaloi zhvillimin e konfliktit ndërmjet disa të miturve.

Procedohen në gjendje të lirë 28 shtetas të mitur, disa prej të cilëve posedonin armë të ftohta/ mjete të mprehta.

Sekuestrohen 5 armë të ftohta/mjete të mprehta.

Shërbimet e Komisariatit të Policisë Nr. 6, në bashkëpunim me shërbimet e Forcës së Posaçme “Shqiponja”, pas marrjes së informacionit në rrugë operative se disa grupe të miturish do të konfliktoheshin me njëri-tjetrin, në Kombinat, kanë organizuar menjëherë punën dhe kanë ndërhyrë për parandalimin e konfliktit.

Në bazë të informacionit, shërbimet e Policisë kanë lokalizuar në rrugën “Llambi Bonata”, disa të mitur të ndarë në grupe, të cilët dyshohet se do të konfliktoheshin me njëri-tjetrin. Shërbimet e Policisë kanë ndërhyrë menjëherë dhe i kanë shoqëruar të miturit, në ambientet e Komisariatit të Policisë Nr. 6.

Gjatë kontrollit fizik, disa prej tyre iu gjetën armë të ftohta (thika), kaçavida, si dhe disa maska, të cilat janë sekuestruar në cilësinë e provës materiale.

Veprimet procedurale me të miturit u kryen në prani të prindërve dhe psikologëve dhe pas komunikimit me prokurorin, nisi procedimi në gjendje të lirë për 28 shtetas të mitur, të moshave 13-17 vjeç.

Materialet procedurale iu referuan Prokurorisë, për veprime të metejshme.