Organizoi vrasjen e policit dhe planifikoi shpërthimin e madh

Një shqiptar i dënuar me burgim të përjetshëm për vepra të rënda kriminale vijon të qëndrojë në Britani, edhe pse kanë kaluar 15 muaj nga humbja e asaj që ishte konsideruar si apeli i tij i fundit kundër dëbimit.

Maksim Çela, 60 vjeç, kreu një dënim të përjetshëm për organizimin e vrasjes së një polici anti-mafia në Shqipëri në vitin 2000, si dhe për një komplot për të hedhur në erë një stadium futbolli.

Pavarësisht përfundimit të dënimit dhe vendimit për dëbimin e tij, Çela mbetet në Britani pasi ka nisur një tjetër betejë ligjore, e cila raportohet se i ka kushtuar taksapaguesve britanikë dhjetëra mijëra paund.

Rasti i tij u bë publik pas një fushate 23-mujore të medias britanike “The Sun” për të rrëzuar një urdhër anonimiteti që mbronte pretendimet e tij lidhur me të drejtat e njeriut.

Çela kishte argumentuar fillimisht se kthimi në Shqipëri do ta ekspozonte ndaj rrezikut nga grupe kriminale rivale. Në pretendimet e tij ai kishte përmendur edhe mundësinë e hakmarrjes nga familjarë të viktimës së tij.

Më vonë, ai ndryshoi versionin dhe pretendoi se deportimi do ta ekspozonte ndaj trajtimit degradues apo torturës.

Megjithatë, në maj të vitit të kaluar, gjyqtari Jeremy Rintoul vendosi kundër tij, duke e cilësuar dëshminë e Çelës si të pabesueshme.

Në atë kohë, zyrtarët e Ministrisë së Brendshme britanike deklaruan se dëbimi i tij ishte i afërt. Por, edhe pas 15 muajsh, Çela vijon të jetë në Britani dhe raportohet se mund të jetojë në zonën e Birminghamit.

Ministria e Brendshme britanike nuk dha shpjegime të hollësishme për vonesën, duke deklaruar vetëm se nuk ishte e gatshme të komentonte në mënyrë të vazhdueshme mbi çështjen.

“Ne do të bëjmë gjithçka që është në fuqinë tonë për të deportuar këtë kriminel të rrezikshëm”, deklaroi Ministria e Brendshme.

Sipas të dhënave të saj, rreth 10 mijë kriminelë të huaj janë dëbuar nga Britania që prej zgjedhjeve të fundit./ The Sun