Skafi merr flakë në Ksamil, shpëtohen turistët gjermanë

Një skaf është përfshirë nga flakët këtë të mërkurë, 2 shtator, në zonën e njohur si “Pema e Thatë”, në Ksamil.

Në bordin e mjetit lundrues ndodheshin katër turistë gjermanë. Pas marrjes së njoftimit, shërbimet e Policisë Kufitare dhe të Njësisë Policore Detare mbërritën menjëherë në vendngjarje.

Katër turistët u evakuuan nga skafi dhe u transportuan me mjetin e Policisë drejt bregut. Sipas autoriteteve, ata janë në gjendje të mirë shëndetësore dhe nuk kanë pësuar dëmtime.

Turistët gjermanë falënderuan punonjësit e Policisë për ndërhyrjen në kohë.

Ndërkohë, grupi hetimor po punon për përcaktimin e shkakut të zjarrit dhe dokumentimin e plotë të rrethanave të ngjarjes.