Dhunuan ndaj Edin, gjykata merr vendimin për Jozin dhe shoku i tij

Gjykata ka caktuar masën e sigurisë “Arrest në shtëpi” për këngëtarin Jozefin Marku dhe mikun e tij, Kristian Nikolli, pas përplasjes fizike me ish-banorin e Big Brother VIP Kosova, Eduart Kuçin.

Marku, i njohur edhe si Joz Marku dhe si ish-banor i Big Brother VIP Albania, ishte arrestuar së bashku me disa persona të tjerë pas incidentit që tërhoqi vëmendje të madhe në rrjetet sociale.

Përplasja mes personazheve nisi pas një serie deklaratash publike dhe akuzash të bëra në rrjetet sociale. Në një video të publikuar më herët, Eduart Kuçi kishte përdorur gjuhë fyese ndaj Markut dhe kishte deklaruar se do të merrte hak në lidhje me shokun e tij, Gjestin.

Në të njëjtën deklaratë, Kuçi kishte paralajmëruar Markun se në rast se do të udhëtonte në Kosovë, do të përballej me të.

Nga përplasja në rrjetet sociale te konflikti fizik

Pas deklaratave të bëra publikisht, rrugët e dy personazheve janë kryqëzuar pak kohë më vonë, duke sjellë edhe përballjen mes tyre.

Situata ka kaluar shpejt nga debati verbal në konflikt fizik. Pamjet e incidentit, të shpërndara gjerësisht në rrjetet sociale, tregojnë momentet e përplasjes mes palëve.

Në video, Jozefin Marku shihet duke goditur disa herë Eduart Kuçin, ndërsa gjatë konfliktit i kërkon llogari për deklaratat, ofendimet dhe kërcënimet e bëra më herët në rrjetet sociale.

Ngjarja solli reagime të shumta në publik, ndërsa autoritetet nisën procedurat për përcaktimin e përgjegjësive të personave të përfshirë.

Me vendimin e fundit të gjykatës, Jozefin Marku dhe Kristian Nikolli do të qëndrojnë në masën e sigurisë “Arrest në shtëpi”, ndërsa çështja vijon të trajtohet nga organet kompetente.