Ndahet nga jeta bashkëshortja e deputetit Loer Kume

Deputeti socialist i Durrësit njofton ndarjen nga jeta të bashkëshortes Lorina Kume. Ai e kujton si shoqen e jetës, nënën e dy fëmijëve dhe “shpirtin binjak”, ndërsa familja ka bërë të ditur edhe oraret e ceremonisë mortore.

Një lajm i rëndë ka prekur familjen e deputetit socialist të qarkut të Durrësit, Loer Kume. Bashkëshortja e tij, Lorina Kume, është ndarë nga jeta.

Lajmin e dhimbshëm e ka bërë publik vetë deputeti, përmes një dedikimi të gjatë dhe emocional, ku i jep lamtumirën bashkëshortes së tij dhe nënës së dy fëmijëve të tyre.

Në fjalët e tij, Kume e përshkruan Lorinën si njeriun me të cilin ka ndarë më shumë se gjysmën e jetës, duke e kujtuar me një varg rolesh dhe cilësish që, sipas tij, e bënë pjesë të pandarë të jetës së tij dhe të familjes.

“Lorina, Lori, Lorushi, dashuria ime që 18 vjeç, më shumë se gjysma ime, shpirti im binjak, shtëpia ime, gruaja, e dashura, shoqja, mësuesja ime, nxënësja ime, busulla ime, mishi im, zëri e fjala e syri im, gjithçkaja e madhe, nëna e fëmijëve tanë, dy mrekullive, sot na la vetëm”, shkruan deputeti.

Në dedikimin e tij, ai shprehet se dhimbja e humbjes prek jo vetëm familjen, por edhe të gjithë ata që e kanë njohur Lorinën dhe kanë qenë pranë saj.

“Ne të tre, familja, njerëzit që e njohën, e prekën, e dëgjuan, u mbështollën nga energjia dhe aura e Lorit, Lorushit, e donim këtu të na donte pa limite e të na ndriçonte siç e ka bërë gjithë jetën e saj”, vijon mesazhi i tij.

Kume përmend gjithashtu një periudhë të vështirë në jetën e bashkëshortes së tij, duke theksuar forcën me të cilën ajo e përballoi atë.

“Fati e deshi ndryshe. Dhe në luftë e tregoi veten njeriun më të fortë që kemi njohur e dëgjuar. Sot kemi trashëgiminë e Lorit pas”, shkruan ai në fund të dedikimit.

“Lorina, Lori, Lorushi, dashuria ime që 18 vjeç, më shumë se gjysma ime, shpirti im binjak, shtëpia ime, gruaja, e dashura, shoqja, mësuesja ime, nxënësja ime, busulla ime, mishi im, zëri e fjala e syri im, gjithçkaja e madhe, nëna e fëmijëve tanë, dy mrekullive, sot na la vetëm. Ne të tre, familja, njerëzit që e njohën, e prekën, e dëgjuan, u mbështollën nga energjia dhe aura e Lorit, Lorushit, e donim këtu të na donte pa limite e të na ndriçonte siç e ka bërë gjithë jetën e saj. Fati e deshi ndryshe. Dhe në luftë e tregoi veten njeriun më të fortë që kemi njohur e dëgjuar. Sot kemi trashëgiminë e Lorit pas”, shkruan ai.

Ceremonia e varrimit dhe pritjet

Ceremonia e varrimit të Lorina Kumes do të zhvillohet të shtunën, më 19 shtator.

Familja ka bërë të ditur gjithashtu oraret e pritjeve, të cilat do të zhvillohen në Agjencinë Leba në Durrës, ku familjarë, miq dhe të afërm do të kenë mundësi të shprehin ngushëllimet për familjen Kume.