“Nuk të takon ty që ta paragjykosh këtë çështje”

Avokati i Hashim Thaçit, Luka Mishetiç, ka reaguar ndaj deklaratave të komisioneres evropiane për Zgjerimin, Marta Kos, lidhur me Dhomat e Specializuara të Kosovës dhe procesin gjyqësor ndaj ish-presidentit të Kosovës dhe ish-krerëve të tjerë të UÇK-së.

Pas vendimit të gjykatës ndaj ish-drejtuesve të Ushtrisë Çlirimtare të Kosovës, Marta Kos e cilësoi Dhomat e Specializuara si një institucion të pavarur dhe të paanshëm, duke nënvizuar se vendimet e tij duhet të respektohen.

Deklarata e saj është kundërshtuar nga Mishetiç, i cili argumenton se vlerësimi mbi mënyrën se si ka funksionuar procesi gjyqësor nuk mund të konsiderohet i përcaktuar paraprakisht.

“Nuk i takon Marta Kos-it ta paragjykojë këtë çështje”, shprehet avokati i Thaçit, duke theksuar se mbetet për t’u vlerësuar nëse Dhomat e Specializuara kanë garantuar realisht një proces të paanshëm në çështjen që lidhet me ish-presidentin e Kosovës.

Në reagimin e tij, Mishetiç sjell në vëmendje edhe një raport të Komitetit për të Drejtat e Njeriut të Shoqatës së Avokatëve të Anglisë dhe Uellsit, i publikuar në maj të vitit 2026.

Sipas avokatit, dokumenti ngre një sërë shqetësimesh që lidhen me funksionimin e procesit gjyqësor në Hagë. Në mënyrë të veçantë, ai përmend çështje që kanë të bëjnë me pavarësinë e gjyqësorit, barazinë e palëve në proces, pranueshmërinë e provave dhe zbatimin praktik të standardeve të drejtësisë.

“Nëse Dhomat e Specializuara të Kosovës kanë vepruar në mënyrë të paanshme në rastin e Thaçit, kjo ende mbetet të përcaktohet. Nuk i takon Marta Kosit që ta paragjykojë këtë çështje”, shkruan avokati.

Raporti është bërë pjesë e debatit mbi mënyrën se si po zhvillohen proceset ndaj ish-krerëve të UÇK-së dhe mbi standardet që zbatohen nga Dhomat e Specializuara.

Nga ana tjetër, vetë Dhomat e Specializuara kanë kundërshtuar disa prej interpretimeve të bëra rreth raportit. Institucioni ka argumentuar se dokumenti nuk ka konstatuar shkelje të të drejtave të personave të akuzuar si pasojë e vendimeve të marra nga gjyqtarët.

Për Mishetiç, kjo do të thotë se debati mbi paanshmërinë e Speciales nuk mund të konsiderohet i përfunduar vetëm përmes deklaratave politike apo institucionale.

Qëndrimi i tij është se vlerësimi për pavarësinë dhe paanshmërinë e Dhomave të Specializuara duhet të lidhet me shqyrtimin konkret të procesit gjyqësor, provave dhe mënyrës se si janë respektuar të drejtat e palëve gjatë procedurave ndaj Hashim Thaçit.