Plani i drejtorisë së përgjithshme të burgjeve për 2024-2030 parashikon ndërtimin e një burgu në kryeqytet

Një burg i ri në Tiranë do të ndihmonte në zgjidhjen e problematikave me të cilat përballen institucionet e vuajtjes së dënimit në kryeqytet. Drejtori i Përgjithshëm i Burgjeve, Adriatik Kupi, ka vlerësuar se burgjet e Jordan Misjes, Ali Demit dhe Mine Pezës nuk i përmbushin kushtet e nevojshme për të mbajtur të paraburgosur apo të dënuar.

Gjatë raportimit në Komisionin për Nismat Qytetare, Kupi u ndal te nevoja për investime në infrastrukturën penitenciare, duke veçuar situatën në burgun e Shënkollit, në Lezhë.

Sipas tij, pritet të nisë faza e parë e punimeve për ndërtimin e një godine të re me kapacitet prej 1 mijë shtretërish. Për këtë projekt është nënshkruar një kontratë me vlerë rreth 8 milionë euro, ndërsa punimet do të zhvillohen në tri faza.

Investime edhe në Kukës dhe Fushë-Krujë

Krahas ndërhyrjes në Shënkoll, Kupi bëri me dije se burgu i ri i Kukësit pritet të përfundojë në qershor të vitit të ardhshëm. Ky projekt, sipas tij, është kërkuar edhe nga partnerët në Kosovë.

Ndërkohë, në burgun e Fushë-Krujës po realizohen dy investime, përkatësisht me vlerë 1.6 miliardë dhe 1.5 miliardë lekë, të cilat synojnë përmirësimin e kushteve dhe ofrimin e standardeve bashkëkohore.

Drejtori i Përgjithshëm i Burgjeve u shpreh se, ndryshe nga situata e mbipopullimit në Shënkoll, në institucionet e tjera të vuajtjes së dënimit gjendja paraqitet më e mirë krahasuar me një vit më parë.

445 vende vakante në sistemin penitenciar

Një tjetër çështje e ngritur gjatë raportimit ishte plotësimi i vendeve vakante në sistemin penitenciar. Sipas Kupit, aktualisht janë 445 pozicione të paplotësuara, ndërsa nevojitet edhe rishikimi i pagave të punonjësve.

Ai bëri me dije se po ndiqen politika për të intensifikuar rekrutimet dhe për të plotësuar nevojat për personel në institucionet e vuajtjes së dënimit.

37 raste të vizitave me eskortë janë referuar në prokurori

Gjatë raportimit, Kupi foli edhe për rastet e vizitave të të dënuarve nga persona të shoqëruar me eskortë. Sipas tij, 37 raste të tilla janë referuar në prokurori për shqyrtim.

Në përfundim, ai u ndal sërish te situata në burgun e Shënkollit, i cili vijon të funksionojë si institucion i vuajtjes së dënimit për personat me masë mjekësore, duke e cilësuar këtë një prej problematikave që kërkojnë vëmendje.