I dënuar me mbi 21 vite burg nga Italia, 40-vjeçari arrestohet në Sauk

Një 40-vjeçar i shpallur në kërkim ndërkombëtar nga autoritetet italiane është arrestuar në Tiranë, pas lokalizimit të tij në zonën e Saukut. Operacioni është zhvilluar nga strukturat e FAST Albania, në bashkëpunim me Drejtorinë Vendore të Policisë Tiranë.

Në kuadër të operacionit “FAST”, shërbimet Operacionale të Sektorit për Kërkimin FAST Albania kanë identifikuar dhe lokalizuar shtetasin Ornado Çeta, i njohur edhe me aliasin Ceta, 40 vjeç, banues në Tiranë.

Çeta është ndaluar me qëllim ekstradimin drejt Italisë, ku ndaj tij rëndon një dënim i gjatë me burgim. Gjykata e Apelit e Triestes e ka dënuar me 21 vjet, 9 muaj e 20 ditë burg për disa vepra penale të rënda.

Sipas vendimit të autoriteteve italiane, 40-vjeçari është dënuar për “Vjedhje të rënda”, “Mashtrim”, “Trafikim të lëndëve narkotike”, “Plagosje”, “Kanosje” dhe “Kundërshtim të punonjësve të policisë”.

Nga dënimi i dhënë nga drejtësia italiane, Çetës i mbeten për të vuajtur më shumë se 20 vite burgim.

Arrestimi në Tiranë është kryer pas punës për lokalizimin e tij nga strukturat FAST Albania. Tashmë çështja ka kaluar në fazën e procedurave ndërkombëtare për transferimin e tij drejt Italisë.

Interpol Tirana ka nisur bashkëpunimin me Interpol Romën për përfundimin e procedurave të nevojshme të ekstradimit të 40-vjeçarit në shtetin italian, ku pritet të vuajë pjesën e mbetur të dënimit.