Pasi “kopsiti” Veliajn, Sadleva i delegon kompetencat te zëvendësi

Drejtoresha e Përgjithshme e Burgjeve, Sadleva Bodo, ka vendosur t’i delegojë për disa ditë kompetencat e saj zëvendësdrejtorit Anesti Kapllani, sipas një shkrese të datës 29 tetor.

Vendimi parashikon që delegimi të jetë në fuqi nga mëngjesi i sotëm deri më 1 nëntor. Deri tani, nuk janë bërë të ditura arsyet që kanë çuar në këtë vendimmarrje.

Lëvizja vjen pas transferimit të kryebashkiakut të Tiranës, Erion Veliaj, nga burgu i Durrësit në institucionin e vuajtjes së dënimit në Fier. Ky transferim ka shkaktuar reagime dhe debat politik, ndërsa vetë Veliaj ka ngritur pretendime për kushtet dhe trajtimin pas mbërritjes në burgun e ri.

Për momentin, nuk ka një shpjegim zyrtar që të lidhë delegimin e kompetencave të Bodos me transferimin e Veliajt. Megjithatë, afërsia kohore mes dy zhvillimeve ka ngritur pikëpyetje mbi arsyet e vendimit.