Eurodeputetja Ilaria Salis: Rama po abuzon me pushtetin, BE të mos heshtë

Eurodeputetja italiane Ilaria Salis ka kritikuar ashpër mënyrën se si qeveria e Edi Ramës po përballet me protestat në Shqipëri, duke ngritur shqetësime për përdorimin e forcës ndaj demonstruesve dhe masat ndëshkuese të propozuara nga mazhoranca.

Gjatë fjalës së saj në Parlamentin Europian, në kuadër të diskutimeve për progresraportin e Shqipërisë, Salis u ndal te protestat e zhvilluara nga të rinjtë shqiptarë, të cilët kërkojnë largimin e kryeministrit Edi Rama dhe kundërshtojnë situatën politike në vend.

Eurodeputetja theksoi se kërkesat e protestuesve nuk duhen shpërfillur nga institucionet europiane. Sipas saj, të rinjtë po kërkojnë një Shqipëri ku korrupsioni të mos përcaktojë të ardhmen e tyre dhe ku të kenë mundësi reale për të studiuar, punuar dhe jetuar me dinjitet.

Salis akuzoi qeverinë shqiptare se, në vend që të dëgjojë pakënaqësinë qytetare dhe të adresojë kërkesat e demonstruesve, po zgjedh përballjen përmes masave represive. Ajo veçoi përdorimin e gazit lotsjellës gjatë protestave, duke e paraqitur këtë qasje si një shqetësim për mënyrën se si po trajtohet e drejta e qytetarëve për të protestuar.

Një tjetër çështje që tërhoqi vëmendjen e eurodeputetes ishte propozimi për vendosjen e gjobave deri në 5 mijë euro ndaj protestuesve. Salis kërkoi vëmendjen dhe mbështetjen e institucioneve europiane, duke nënvizuar se masat e tilla nuk duhet të kalojnë pa u diskutuar në nivel europian.

Në mesazhin e saj, eurodeputetja bëri një thirrje të drejtpërdrejtë për solidaritet me të rinjtë shqiptarë, duke paralajmëruar se çështja e tyre nuk duhet trajtuar si një problem i brendshëm që mund të lihet në heshtje.

“Lufta e tyre është lufta juaj. Situata duhet të përmirësohet, duhet të dëgjojmë zërat e protestuesve në Shqipëri dhe t’u japim hapësirë”, deklaroi Ilaria Salis.

Deklaratat e saj vijnë në një kohë kur protestat kundër qeverisë vijojnë të mbajnë në qendër të debatit publik reagimin e Policisë, përdorimin e mjeteve të forcës dhe propozimet për ashpërsimin e masave ndaj pjesëmarrësve në tubime.