Nga çmimet në SHBA te “leksionet” për republikanët

Katër mandate në opozitë në Shqipëri nuk e kanë penguar Sali Berishën të marrë rolin e analistit të politikës amerikane. Kreu i Partisë Demokratike ka komentuar humbjen e pozicioneve të republikanëve në Kongres dhe Senat, duke shpjeguar me hollësi se çfarë nuk shkoi për krahun politik të Donald Trumpit. Një analizë që vjen nga një politikan që prej vitesh përballet me të njëjtën pyetje në vendin e tij: pse opozita që drejton nuk arrin të rikthehet në pushtet?

I ftuar në emisionin “Now”, Berisha e vendosi ekonominë në qendër të shpjegimit të tij. Sipas tij, votuesit amerikanë janë ndikuar nga rritja e çmimeve të produkteve dhe shërbimeve, ndërsa si faktorë që kanë rënduar situatën përmendi politikën e tarifave tregtare dhe konfliktin me Iranin.

Në analizën e tij, një rol të veçantë zë edhe Ngushtica e Hormuzit, të cilën Teherani, sipas Berishës, e ka përdorur si instrument presioni strategjik. Këto zhvillime, argumentoi ai, kanë ndikuar drejtpërdrejt në ekonominë e përditshme të amerikanëve dhe, rrjedhimisht, në zgjedhjen e tyre politike.

“Populli amerikan, fatlum që zhvillon zgjedhje të lira dhe të ndershme, votoi për kandidatët që ai konsideron dhe politikat që i konsideron më të mira”, u shpreh Berisha.

Berisha analizon humbjen e Trumpit, por jo katër mandatet e opozitës

Humbja e republikanëve nuk duket se e shqetëson kreun e PD-së për raportet e tij me administratën amerikane. I pyetur nëse ndryshimi i balancave politike në Uashington mund të ndikojë në marrëdhëniet e tij me SHBA-në, Berisha u përgjigj se asgjë nuk ndryshon.

Për të mbështetur qëndrimin e tij, ai iu referua deklaratave të kryeministrit Edi Rama për demokratët amerikanë dhe Donald Trumpin, duke e përdorur këtë kontrast për të argumentuar se vetë ka mbajtur një qëndrim konstant.

“Asgjë nuk ndryshon në raportin tim me këtë administratë. Duhet t’i druhet pak Edi Rama, që vetëm tre javë më parë deklaroi demokratët dhe Bidenin tradhtarë të Hashim Thaçit, dhe vetëm dy javë më parë u çoi atyre mesazhin se ‘nuk e mundni dot Donald Trumpin me vota dhe kërkoni ta mundni me Zvërnecin’. Kështu që Sali Berisha është konstant”, tha ai.

Me pak fjalë, ndërsa republikanët po përballen me pasojat e rezultatit elektoral në SHBA, Berisha ka gjetur shpjegimin te ekonomia, Irani dhe tarifat tregtare. Për rezultatin e opozitës shqiptare, që ai drejton prej vitesh, duket se bilanci kërkon një analizë më të gjatë se një intervistë televizive.

Edhe pritja e ambasadorit amerikan, një çështje e sqaruar nga Berisha

Në intervistë u diskutua edhe mungesa e tij në ceremoninë e pritjes së ambasadorit të ri amerikan në Tiranë. Berisha mohoi që kjo të ishte diçka e pazakontë, duke pretenduar se gjatë ardhjes së shtatë apo tetë ambasadorëve amerikanë në Shqipëri kishte marrë pjesë vetëm në një rast.

“Në pritjen e ardhjes së tij, të mirëseardhjes së tij, kam qenë vetëm njëherë tek një ambasador. Vetëm në një rast! Në shtatë raste apo tetë raste s’kam qenë”, deklaroi ai.

Sa i përket marrëdhënieve institucionale, kreu i PD-së tha se partia e tij mbetet e hapur për komunikim me ambasadën amerikane dhe se përfaqësuesit demokratë vijojnë të përcjellin qëndrimet e tyre për zhvillimet politike në Shqipëri.

Kështu, Berisha vijon të analizojë zgjedhjet, humbjet dhe lëvizjet politike përtej Atlantikut, ndërsa në Tiranë mbetet për t’u parë se kur do të vijë radha e një bilanci për katër mandatet e opozitës që drejton.