Banorët e Unazës: Po kërkojnë të na përçajnë me oferta, por …

Paralelisht me protestën e studentëve, në Tiranë ka nisur edhe protesta te Unaza e Re. Banorët janë vendosur në të dyja asket e rrugës pranë mbikalimit në këtë zonë, duke bllokuar qarkullimin e mjeteve.

Protesta te Unaza e Re shënon ditën e 41 ndërsa banorët kundërshtojnë prishjen e banesave të tyre siç e parashikon plani për ndërtimin e aksit nga sheshi “Shqiponja”, te mbikalimi pranë pallatit me shigjeta. Ata kërkojnë edhe rrëzimin e projektit.

“Duan të na përçajnë me oferta”, u tha nga megafoni i protestës.

Pyetjes së gazetarëve nga terreni, kush po tenton t’iu përçajë, protestuesi i cili hodhi akuzat u përgjigj: “Po kush tjetër përveç zagarëve të Afrim Qendros dhe Erjon Velisë, me arrestime presione, pseudo-oferta”.

Në protestë, u kërkua edhe lirimi i Daniel Dobrajt dhe Dorjan Protoduarit, të cilët janë ende në qeli, që pas protestës të dhunshme, të zhvilluar para Kuvendit, më 22 nëntor.